អន្តរជាតិ
អាមេរិកថាការវាយប្រហាររបស់រុស្ស៊ីទៅលើហេដ្ឋារចនាសម្ព័ន្ធអ៊ុយក្រែន មិនអាចបំបែកក្រុមបស្ចិមប្រទេសទេ
រដ្ឋមន្ត្រីការបរទេសសហរដ្ឋអាមេរិកលោក Antony Blinken ថ្លែងនៅសន្និសីទព័ត៌មានមួយក្នុងអំឡុងកិច្ចប្រជុំរដ្ឋមន្ត្រីអង្គការអូតង់នៅទីក្រុងប៊ុយការ៉េស
×![]()
ដោយ: VOA
សហរដ្ឋអាមេរិកបាននិយាយនៅថ្ងៃពុធថា យុទ្ធនាការជាច្រើនសប្តាហ៍របស់រុស្ស៊ីក្នុងការវាយប្រហារទៅលើគោលដៅហេដ្ឋារចនាសម្ព័ន្ធផ្តល់កម្តៅ អគ្គិសនី និងទឹករបស់អ៊ុយក្រែននោះ នឹងមិនអាចបំបែកបំបាក់ការតាំងចិត្តរបស់ក្រុមប្រទេសលោកខាងលិចក្នុងការគំាទ្ររដ្ឋាភិបាលអ៊ុយក្រែន ដើម្បីប្រយុទ្ធនឹងសង្គ្រាមឈ្លានពានរបស់រុស្ស៊ីដែលមានរយៈពេល៩ខែនោះឡើយ។
បន្ទាប់ពីបញ្ចប់កិច្ចប្រជុំកំពូលរបស់អង្គការអូតង់ដែលមានរយៈពេល២ថ្ងៃ ក្នុងទីក្រុង Bucharest ប្រទេសរូម៉ានី រដ្ឋមន្ត្រីការបរទេសសហរដ្ឋអាមេរិក លោក Antony Blinken បាននិយាយនៅក្នុងសន្និសីទសារព័ត៌មានមួយថា ប្រធានាធិបតីរុស្ស៊ីលោក Vladimir Putin បានផ្តោតភ្លើងកំហឹងរបស់លោកប្រឆាំងនឹងជនស៊ីវិលអ៊ុយក្រែន ខណៈពេលដែលរដូវរងាដ៏ខ្លាំងកំពុងចូលមកដល់។
លោក Blinken បន្ថែមទៀតថា៖ «ចរន្តអគ្គិសនី ទឹក និងប្រព័ន្ធផ្តល់កម្តៅ ទាំងនេះជាគោលដៅថ្មីនៃការវាយប្រហាររបស់លោកប្រធានាធិបតី Putin។ លោក Putin បានធ្វើការវាយប្រហារយ៉ាងខ្លាំងលើគោលដៅទាំងនោះ។ អំពើឃោរឃៅទៅលើប្រជាជនអ៊ុយក្រែននេះ គឺមានលក្ខណ:ព្រៃផ្សៃខ្លាំងណាស់»។
ប្រមុខការទូតអាមេរិករូបនេះ ក៏បានចោទប្រកាន់លោក Putin ពីបទព្យាយាមដើម្បីបំបែកបំបាក់ក្រុមសម្ព័ន្ធភាពបស្ចិមប្រទេស ដែលកំពុងគាំទ្រប្រទេសអ៊ុយក្រែន ស្របពេលដែលតម្លៃប្រេងពិភពលោកកំពុងហក់ឡើងខ្ពស់ ហើយប្រទេសអ៊ុយក្រែនកំពុងប្រឈមនឹងការដាច់ចរន្តអគ្គិសនីជាប្រចាំថ្ងៃកាន់តែខ្លាំងឡើងនោះ។
លោក Blinken បញ្ជាក់ទៀតថា៖ «យុទ្ធសាស្ត្រនេះមិនអាច នឹងមិនបានផលនោះឡើយ។ យើងនឹងបន្តបង្ហាញថា លោក Putin យល់ខុសលើរឿងនេះ។ នេះជាអ្វីដែលខ្ញុំបានឮយ៉ាងខ្លាំងនិងយ៉ាងច្បាស់ ពីគ្រប់ប្រទេសទាំងអស់នៅក្នុងជំនួបក្នុងទីក្រុង Bucharest នេះ»។
ទន្ទឹមនឹងនេះដែរ ប្រធានគណៈកម្មការអឺរ៉ុបលោកស្រី Ursula von der Leyen បានអំពាវនាវឱ្យមានតុលាការពិសេសមួយ ដើម្បីកាត់ទោសឧក្រិដ្ឋកម្មរបស់រុស្ស៊ីដែលបានប្រព្រឹត្តទៅលើអ៊ុយក្រែន។ លោកស្រីបានស្នើឱ្យមានតុលាការមួយដែលគាំទ្រដោយអង្គការសហប្រជាជាតិ ដើម្បីស៊ើបអង្កេត និងកាត់ទោសឧក្រិដ្ឋកម្មឈ្លានពានរបស់រុស្ស៊ី៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
6 ថ្ងៃ
