ព្រឹត្តិការណ៍ World Cup 2022 បានបង្កើតរឿងរ៉ាវអស្ចារ្យប្លែកៗជាច្រើនសឹងមិនគួរឱ្យជឿ។ អតីតម្ចាស់ជើងឯកដូចជាអាហ្សង់ទីន, អេស្ប៉ាញ, អាល្លឺម៉ង់ និងប្រេស៊ីលសុទ្ធតែជួបរឿងខកចិត្ត ក្រោយចាញ់ការប្រកួតក្នុងវគ្គចែកពូលដូចគ្នា។ ចំណែកក្រុមមកពីទ្វីបអាហ្រ្វិក អាស៊ី និងអាម៉េរិកបង្ហាញវត្តមានក្នុងវគ្គ ១៦ក្រុមចុងក្រោយដ៏គួរឱ្យភ្ញាក់ផ្អើលជាមួយនិងក្រុមប្រជែងខ្លាំងប្រចាំប្រវត្តិសាស្ត្រ World Cup។
 

តាមរយៈសេចក្តីថ្លែងការណ៍មួយដែលបង្ហោះដោយ FIFA នាថ្ងៃទី៧ នេះប្រធាន FIFA លោក Infantino សរសើរការប្រកួតរបស់ក្រុមទាំងអស់ក្នុងវគ្គចែកពូល និងក្រុមតូចៗបានបំបាក់ក្រុមធំៗជារឿងដ៏ភ្ញាក់ផ្អើល ហើយការប្រកួតបានទាក់ទាញចំណាប់អារម្មណ៍មនុស្សទស្សនាតាមកញ្ចក់ទូរទស្សន៍ជាង ២ពាន់លាននាក់។ 
 

«ការប្រកួតតាមកីឡដ្ឋានដ៏ស្រស់ស្អាត បរិយាកាសពិតជាអស្ចារ្យ គ្រាប់បាល់ដ៏អស្ចារ្យច្រើនណាស់ រាល់ការប្រកួតមានភាពភ្ញាក់ផ្អើលមិនគួរឱ្យជឿ ក្រុមតូចៗបំបាក់ក្រុមធំៗ។ ពិតណាស់វាមិនមានក្រុមតូចៗទៀតទេ ឬក្រុមដែលធំៗទៀតដែរ គម្រិតនៃបាល់ទាត់ពេលនេះគឺមានសមត្ថភាពសឹងស្មើៗគ្នា។ ក្រុមជម្រើសជាតិមកពីទ្វីបទាំងអស់កំពុងតែបន្តដំណើរទៅវគ្គជម្រុះ លើកដំបូងក្នុងប្រវត្តិសាស្រ្ត នេះទើបបង្ហាញថាបាល់ទាត់ទើបជាពិភពលោកដ៏ពិតប្រាកដ។»។ លោក Infantino បាននិយាយបែបនេះ។
 

ព្រឹត្តិការណ៍ World Cup 2022 ដំណើរការបានយ៉ាងល្អខុសពីការគិត។ លោក Infantino បានបង្វែរការរិះគន់ជាច្រើនពីសំណាក់ប្រទេសទ្វីបអឺរ៉ុបមកលើប្រទេសម្ចាស់ផ្ទះកាតា ដោយក្នុងសេចក្តីថ្លែងការណ៍លោកបានលើកឡើងថា ការចូលរួមប្រកួតគឺជាមធ្យោបាយតែមួយគត់ដើម្បីកែលម្អសិទ្ធិមនុស្ស។
 

មិនត្រឹមប៉ុណ្ណោះប្រធានស្ថាប័នកំពូល FIFA រូបនេះក៏បានបង្ហាញអារម្មណ៍រីករាយជាមួយចំនួនអ្នកគាំទ្រក្នុងកីឡដ្ឋាន និងតាមតំបន់អ្នកគាំទ្រក្នុងប្រទេសកាតា។ លោក Infantino ក៏បង្ហាញក្តីរំពឹងថាចំនួនអ្នកទស្សនាតាមកញ្ចក់ទូរទស្សន៍នឹងអាចកើតឡើងទៅដល់ ៥ពាន់លានដង ខណៈការប្រកួតកន្លងមកមានអ្នកតាមដានជាង ២ពាន់លាននាក់រួចមកហើយ។

គួររំលឹងដែលថាលោក Infantino ដែលបានចូលកាន់តំណែងប្រធាន FIFA តាំងពីឆ្នាំ ២០១៦  បានធ្វើកំណែរទម្រង់នៃព្រឹត្តិការណ៍ World Cup 2022 នេះដោយបានបង្កើនចំនួនកីឡាករតាមក្រុមនីមួយៗពី ២៣នាក់ ដល់ ២៦នាក់។ ចំណែក World Cup 2026 ដែលមានអាម៉េរិក ម៉ិកស៊ិក និងកាណាដាជាសហម្ចាស់ផ្ទះនឹងបង្កើនចំនួនក្រុមពី ៣២ដល់ ៤៨ក្រុមសម្រាប់ការប្រកួតប្រជែង៕