ធ្វើជាអធិបតីក្នុងប្រជុំនៃ គ.ជ.អ.ប. នៅថ្ងៃទី៨ ខែធ្នូ ឆ្នាំ២០២២នេះ សម្តេចរដ្ឋមន្រ្តី បញ្ជាក់ដូច្នេះថា៖«បើមិនមានការផ្ទេរសិទ្ធិអំណាច មុខងារ និងធនធានទៅឲ្យរដ្ឋបាលថ្នាក់ក្រោមជាតិ ដំណើរការកំណែទម្រង់នេះ មិនអាចចាត់ទុកថា ជាដំណើរការកំណែទម្រង់វិមជ្ឈការ និងវិសហមជ្ឈការបានឡើយ ហើយរដ្ឋបាលថ្នាក់ក្រោមជាតិ ដែលមិនមានតួនាទី មុខងារ និងសិទ្ធិអំណាចជាក់លាក់ ប្រៀបដូចជា រដ្ឋបាលដែលមានដៃទទេ មិនអាចក្លាយជារដ្ឋបាលដែលត្រូវគ្រប់គ្រងតាមគោលការណ៍នៃរដ្ឋបាលឯកភាព និងតាមបែបប្រជាធិបតេយ្យ...បានឡើយ»។

 

 

សម្ដេច ថ្លែងទៀតថា កម្មវិធីជាតិដំណាក់កាលទី២ ជាផែនទីបង្ហាញផ្លូវដ៏ច្បាស់លាស់ សម្រាប់ជំរុញការធ្វើកំណែទម្រង់វិមជ្ឈការ និងវិសហមជ្ឈការនៅកម្ពុជាឲ្យកាន់តែស៊ីជម្រៅ។ កម្មវិធីជាតិដំណាក់កាលទី២ សំដៅលើកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដំណាក់កាលទី២ ដែលត្រូវអនុវត្តពីឆ្នាំ២០២១ ដល់ឆ្នាំ២០៣០។ កម្មវិធីជាតិសម្រាប់ការអភិវឌ្ឍនៅថ្នាក់ក្រោមជាតិដំណាក់កាលទី១ ត្រូវបានអនុវត្តចាប់តាំងពីឆ្នាំ២០១០មក ហើយត្រូវបានអនុវត្តចប់ នៅ២០១៩៕