នេះជាការជួបគ្នាលើកទីបី សម្រាប់ក្រូអាស៊ី និងប្រេស៊ីលក្នុង World Cup ដោយពីរលើកបានកើតឡើងនៅឆ្នាំ ២០០៦ និង​ ២០១៤ ហើយក្រុមសាំបាប្រេស៊ីលយកឈ្នះទាំង ២ប្រកួត។ ក្រូអាស៊ីកំពុងសម្លឹងរកការឆ្លងផុតទៅកាន់វគ្គពាក់កណ្តាលផ្តាច់ព្រ័ត្រលើកទី៣ ខណៈប្រេស៊ីលនឹងក្លាយជាលើកទី៨។
 

ក្រូអាស៊ីបញ្ចប់ចំណាត់ថ្នាក់លេខ២ នៅវគ្គចែកពូល ក្រោយប្រកួតស្មើម៉ារ៉ុក​ ០-0 ស្មើបែលហ្ស៊ិក ១-១ និងឈ្នះកាណាដា ៤-១ ហើយឈ្នះជប៉ុននៅវគ្គ ១៦ក្រុមដោយការស៊ុតបាល់កាត់សេចក្តី ១១ម៉ែត្រលទ្ធផល ៣-១ តែយ៉ាងណាក្រូអាស៊ីហាក់បីមិនទាន់បានបង្ហាញទម្រង់លេងដ៏ល្អដែលធ្លាប់បានជួយនាំពួកគេឡើងដល់វគ្គផ្តាច់ព្រ័ត្រដូចឆ្នាំ​២០១៨​ នៅឡើយ។ ក្រុមជើងឯក ៥សម័យប្រេស៊ីលក្នុងនាមជាក្រុមកំពូលតារាងពូល G ឆ្លងកាត់ការប្រកួតកន្លងមកឈ្នះស៊ែប៊ី ២-០ ឈ្នះស្វ៊ីស ១-០ ចាញ់កាមេរូន ១-០ ហើយវគ្គ១៦ក្រុម យកឈ្នះកូរ៉េខាងត្បូង ៤-១ ដោយងាយស្រួល ប្រេស៊ីលហាក់បីធ្វើបានល្អជាងឆ្នាំ​ ២០១៨ នៅរុស្ស៊ីដែលពួកគេបានធ្លាក់ចេញត្រឹមវគ្គ ១៦ក្រុមចុងក្រោយ។
 

ជើងឯករងក្រូអាស៊ី រាត្រីនេះនឹងត្រូវអវត្តមានកីឡាករសំខាន់ដូចជា Borna Sosa ខ្សែការពារស្លាបឆ្វេងរងរបួស ខណៈប្រេស៊ីលខ្សែការពារស្លាបឆ្វេង Alex Sandro រងរបួស ព្រមទាំង Alex Telles និង Gabriel Jesus អវត្តមានពីការប្រកួតតែម្តងដោយសាររបួសធ្ងន់ធ្ងរ។
 

ក្រឡែកទៅកាន់ជំនួបរវាងហូឡង់ជើងឯករង ៣សម័យ តទល់អាហ្សង់ទីនម្ចាស់ពាន ២សម័យ ប្រជែងគ្នាដណ្តើមកៅអីវគ្គពាក់កណ្តាលផ្តាច់ព្រ័ត្រនាកីឡដ្ឋាន Lusail Iconic វេលាម៉ោង ២យប់វិញ នេះនឹងក្លាយជាការប៉ះគ្នាជាថ្មីម្តងទៀតហើយរវាងក្រុមទាំងពីរចាប់តាំងពី World Cup ឆ្នាំ ២០១៤ នៅប្រេស៊ីលរួចមក។ 
 

Lusail Iconic ក្លាយជាទីតាំងកាត់សេចក្តីការប្រកួតរបស់ហូឡង់ និងអាហ្សង់ទីន ដែលជាការជួបគ្នាលើកទី៦ ក្នុងព្រឹត្តិការណ៍ World Cup ដោយការជួបគ្នា ៥លើកមុនកើតឡើងនៅឆ្នាំ ១៩៧៤ ហូឡង់ឈ្នះ ៤-០ ចូលដល់ឆ្នាំ១៩៧៨ អាហ្សង់ទីនយកឈ្នះវិញ ៣-១ ប៉ះលើកទី៣ ឆ្នាំ​ ១៩៩៨ ហូឡង់ឈ្នះ ២-១ ជួបគ្នាម្តងទៀតលើកទី៤ ឆ្នាំ​២០០៦ លទ្ធផលស្មើ ០-០ និងលើកទី៥ នៅប្រេស៊ីល អាហ្សង់ទីនទម្លាក់ហូឡង់វគ្គពាក់កណ្តាល់ផ្តាច់ព្រ័ត្រដោយការស៊ុតបាល់កាត់សេចក្តី ១១ម៉ែត្រ។
 

ទាំងហូឡង់និងអាហ្សង់ទីនឡើងមកប៉ះគ្នានៅវគ្គ​ ៨ក្រុមចុងក្រោយសុទ្ធសឹងតែជាក្រុមឈរនៅកំពូលតារាងដូចគ្នារៀងៗខ្លួន។ ហូឡង់កាន់តំណែងកំពូលតារាងពូល A ដោយប្រកួតយកឈ្នះម្ចាស់ផ្ទះកាតា ២-០ ស្មើអេក្វាទ័រ ១-១ និងឈ្នះសេណេហ្កាល់​ ២-០ ឆ្លងផុតវគ្គ ១៦ក្រុមហូឡង់បានយកឈ្នះលើក្រុមអាម៉េរិក ៣-១ ចំណែកអាហ្សង់ទីនលេង១ ពូល C ប្រកួតឈ្នះម៉ិកស៊ិក ២-០ ឈ្នះប៉ូឡូញ ២-០ និងចាញ់អារ៉ាប៊ីសាអូឌីត ២-១ កាលពីប្រកួតវគ្គ ១៦ក្រុមចុងក្រោយអាហ្សង់ធ្វើបានល្អខ្លាំងដោយទម្លាក់អូស្តា្រលីលទ្ធផល ២-១៕