Apple មានភាពជាក់​លាក់​លើ​ផលិត​ផល​ទូរសព្ទ​ដៃ​របស់​ខ្លួន ពីមួយម៉ូឌែល​ទៅមួយ​ម៉ូឌែល ប៉ុន្តែ​វា​មិន​ងាយ​ស្រួល​នោះឡើយ​ទាក់ទង​នឹង​គម្រោង​រថយន្តអគ្គិសនី​ស្វយ័ត។ តាមប្រភពដែល​ខ្លួន​ទទួល​បាន នោះ Bloomberg អះអាងថា រថយន្ត​អគ្គិសនី​ស្វយ័ត Apple Car អាច​នឹង​ត្រូវ​ពន្យា​រហូត​ដល់​ឆ្នាំ​២០២៦ ជាមួយ​នឹង​តម្លៃមូលដ្ឋាន១០ម៉ឺន​ដុល្លារអាម៉េរិក។

 

ក្រុមហ៊ុនដែលមានមូលដ្ឋាននៅក្រុង Cupertino រដ្ឋកាលីហ្វនីញ៉ា បាន​ស្នើ​តម្លៃ​១០ម៉ឺន​ដុល្លារអាម៉េរិក សម្រាប់​រថយន្ត​នៃគម្រោង Project Titan របស់ខ្លួន ដោយដំបូងឡើយ គឺ​មានតម្លៃ​១២ម៉ឺន​ដុល្លារអាម៉េរិក។ គម្រោង​ត្រូវការពេល​វេលា​អភិវឌ្ឍនៅ​ឆ្នាំ​២០២៥ ដូច្នេះរថយន្តមិនអាចបង្ហាញវត្តមាន​មុន​ឆ្នាំ២០២៦នោះឡើយ។

 

Bloomberg បាន​បញ្ជាក់ថា គម្រោងនេះ ស្ថិតក្នុង​ភាពជាប់គាំងអស់​រយៈពេល​ជាច្រើន​ខែ​ ដោយ​ថ្នាក់​ដឹកនាំ​ Apple មិន​ទាន់ឈាន​ដល់​ការឯកភាព​គ្នា​លើ​ចក្ខុវិស័យ​ ដែល​សម​ស្រប​ទៅនឹង​បច្ចេក​វិទ្យា​បច្ចុប្បន្ន ជាពិសេស​បញ្ហា ឈ្នាន់ និង​ដៃចង្កូត ជាដើម។

 

ទោះបីជាមាន​ការផ្សព្វផ្សាយជាបន្ត​បន្ទាប់យ៉ាងណាក៏ដោយ ក្រុមហ៊ុន Apple មិន​ដែលបាន​លើកឡើង​ពី​វត្តមាននៃគម្រោង Project Titan នោះឡើយ។ តាមការផ្សព្វផ្សាយ​តៗគ្នា គម្រោងនេះ ត្រូវបានអនុម័ត​ដោយ​អគ្គនាយក Apple លោក Tim Cook នៅ​ចុងឆ្នាំ២០១៤ ហើយ​ដឹកនាំ​ដោយ​ លោក Steve Zadesky៕