អន្តរជាតិ
កូរ៉េខាងត្បូងថានឹងសម្របសម្រួលជាមួយអាម៉េរិក និងជប៉ុន ដើម្បីដាក់ទណ្ឌកម្មលើកូរ៉េខាងជើង លោក Sung Kim តំណាងភាគីអាម៉េរិក (កណ្តាល) ចាប់ដៃជាមួយលោក Kim Gunn តំណាងពិសេសរបស់កូរ៉េខាងត្បូង (ខាងឆ្វេង) និងលោក លោក Funakoshi Takehiro តំណាងជប៉ុន។ រូបភាព៖ Reuters
× ប្រេសិតកូរ៉េខាងត្បូង នៅថ្ងៃទី១៣ ខែធ្នូ បានលើកឡើងថា កូរ៉េខាងត្បូង ជប៉ុន និងអាម៉េរិក នឹងពង្រឹងការដាក់ទណ្ឌកម្មលើកូរ៉េខាងជើង និងធ្វើឱ្យទណ្ឌកម្មអន្តរជាតិប្រឆាំងនឹងកូរ៉េខាងជើងកាន់តែមានប្រសិទ្ធភាព។
លោក Kim Gunn តំណាងពិសេសរបស់កូរ៉េខាងត្បូងទទួលបន្ទុកកិច្ចការសន្តិភាព និងសន្តិសុខឧបទ្វីបកូរ៉េក្នុងកិច្ចប្រជុំមួយនៅរដ្ឋធានីហ្សាការតារបស់ឥណ្ឌូណេស៊ីជាមួយសមភាគីអាម៉េរិក និងជប៉ុន បានលើកឡើងថា កូរ៉េខាងជើងកាន់តែបង្កការគំរាមគំហែង និងពង្រឹងសមត្ថភាពនុយក្លេអ៊ែររបស់ខ្លួនដែលជារឿងគួរឱ្យព្រួយបារម្ភ។ លោក Kim ក៏បានសង្កត់ធ្ងន់ថា ការកើនឡើងនៃការគំរាមគំហែងពីកូរ៉េខាងជើងនឹងត្រូវបានឆ្លើយតបយ៉ាងម៉ឺងម៉ាត់ពីសហគមន៍អន្តរជាតិទាំងមូល។
លើសពីនេះ លោក Kim ក៏បានអំពាវនាវឱ្យចិនដែលជាសម្ព័ន្ធមិត្តជិតស្និទ្ធបំផុតរបស់កូរ៉េខាងជើង និងមានឥទ្ធិពលលើទីក្រុងព្យុងយ៉ាងបន្តដើរតួក្នុងន័យស្ថាបនាក្នុងការរក្សាស្ថេរភាពនិងសន្តិសុខក្នុងតំបន់។
ទន្ទឹមនឹងនេះ តំណាងពិសេសរបស់អាម៉េរិកប្រចាំកូរ៉េខាងជើង លោក Sung Kim ក្នុងកិច្ចប្រជុំដដែលបានលើកឡើងថា អាកប្បកិរិយារបស់ទីក្រុងព្យុងយ៉ាងបង្ហាញពីបញ្ហាប្រឈមផ្នែកសន្តិសុខដ៏ធ្ងន់ធ្ងរបំផុតមួយនៅក្នុងតំបន់ និងអាចបង្កការគំរាមគំហែងលើសពីនេះ។
«កូរ៉េខាងជើងបានបង្កជាបញ្ហាប្រឈមមួយដែលអាចដោះស្រាយបានដោយជោគជ័យ លុះត្រាតែសហគមន៍អន្តរជាតិរួមគ្នា និងនិយាយក្នុងសំឡេងឯកភាពគ្នាតែមួយ»។ លោក Sung Kim បានបន្តបែបនេះ។
ស្របគ្នានេះ អគ្គនាយកទទួលបន្ទុកកិច្ចការអាស៊ី និងមហាសមុទ្ររបស់ក្រសួងការបរទេសជប៉ុនលោក Funakoshi Takehiro បាននិយាយថា សម្ព័ន្ធមិត្តទាំងបីបានបង្កើនកិច្ចសហប្រតិបត្តិការសន្តិសុខដល់កម្រិតដែលមិនធ្លាប់មានពីមុនមក។ លើសពីនេះ ភាគីទាំងបីនឺងធ្វើការរួមគ្នាប្រឆាំងនឹងការគំរាមកំហែងពីកូរ៉េខាងជើង ខណៈនៅតែបើកចំហសម្រាប់ការសន្ទនាជាមួយទីក្រុងព្យុងយ៉ាង។
គួរបញ្ជាក់ថា សម្ព័ន្ធមិត្តទាំងបី កូរ៉េខាងត្បូង ជប៉ុន និងអាម៉េរិក ក្នុងខែនេះ បានដាក់ទណ្ឌកម្មបន្ថែមទៀតលើមន្ត្រីកូរ៉េខាងជើង ដែលបានចូលរួមចំណែកក្នុងកម្មវិធីអាវុធរបស់កូរ៉េខាងជើង បន្ទាប់ពីការធ្វើតេស្តមីស៊ីលបាលីស្ទិកអន្តរទ្វីបរបស់ទីក្រុងព្យុងយ៉ាងនាពេលថ្មីៗនេះ។
ការដាក់ទណ្ឌកម្មនេះធ្វើឡើងបន្ទាប់ពីកូរ៉េខាងជើងបានបាញ់សាកល្បងមីស៊ីលបាលីស្ទិកអន្តរទ្វីបនៅពាក់កណ្ដាលខែវិច្ឆិកាកន្លងទៅ ដែលជាផ្នែកមួយនៃការបាញ់មីស៊ីលជាង ៦០ ដងក្នុងឆ្នាំនេះ។ ខណៈការបាញ់សាកល្បងអាវុធជាហូរហែនេះ សហគមន៍អន្តរជាតិក៏បង្ហាញការព្រួយបារម្ភថា កូរ៉េខាងជើងអាចនឹងបន្តការសាកល្បងអាវុធនុយក្លេអ៊ែរឡើងវិញបន្ទាប់ពីផ្អាកក្នុងឆ្នាំ ២០១៧ ផងដែរ៕
Tag:
កូរ៉េខាងត្បូង
អាម៉េរិក
ជប៉ុន
កូរ៉េខាងជើង
© រក្សាសិទ្ធិដោយ thmeythmey.com