ជាតិ
ព្រះពុទ្ធបដិមាកម្ពស់១០៨ម៉ែត្រ ចាប់ផ្ដើមសង់នៅដើមឆ្នាំ២០២៣ លើខ្នងភ្នំបូកគោ
រចនាបថ ព្រះពុទ្ធបដិមា កម្ពស់១០៨ម៉ែត្រ ដែលនឹងចាប់ផ្ដើមសាងសង់នៅដើមឆ្នាំ២០២៣។ រូបភាពផ្ដល់ដោយ លោក នេត្រ ភក្រ្តា អ្នកនាំពាក្យក្រសួងបរិស្ថាន
×![]()
ដោយ: ឈុំ ចន្ថា
ភ្នំពេញ៖ ព្រះពុទ្ធបដិមា កម្ពស់១០៨ម៉ែត្រ នឹងចាប់ផ្ដើមសាងសង់នៅដើមឆ្នាំ ២០២៣ លើខ្នងភ្នំបូកគោ ត្រង់ចំណុចវាស្រែ ៥០០។ ពុទ្ធបដិមាក៏ខ្ពស់នេះ ត្រូវបានផ្ដួចផ្ដើមគំនិតដោយ ក្រុមហ៊ុន សុខាអូតែល របស់អ្នកឧកញ៉ា សុខ គង់។ 
លោក នេត្រ ភក្ត្រា រដ្ឋលេខាធិការ និងអ្នកនាំពាក្យក្រសួងបរិស្ថាន បានសារព័ត៌មានថ្មីៗ នៅរសៀលថ្ងៃទី១៧ ខែធ្នូនេះថា គម្រោងសង់ព្រះពុទ្ធបដិមាខ្ពស់ជាងគេនៅកម្ពុជានេះ ត្រូវបានឯកភាពដោយរដ្ឋាភិបាលកម្ពុជារួចរាល់ហើយ ទាំងផ្នែកបច្ចេកទេស និងរចនាបថ។ ក្នុងនោះដែរ រចនាបថមួយចំនួន ត្រូវបានដកស្រង់ចេញពីក្បាច់ប្រាសាទនានារបស់កម្ពុជា។ ក្រុមហ៊ុន សុខាអូតែល នឹងចាប់ផ្ដើមបញ្ចុះបឋមសិលាសាងសង់ នៅដើមឆ្នាំ២០២៣ខាងមុខ។
លោក បញ្ជាក់ដូច្នេះថា៖ «រដ្ឋាភិបាលកម្ពុជា បានចេញសេចក្ដីសម្រេចហើយ តាមរយៈសេចក្ដីជូនដំណឹងមួយ នៅខែថ្ងៃទី១ ខែកញ្ញាឆ្នាំ២០២២ ដោយអនុញ្ញាតឱ្យក្រុមហ៊ុន សុខាអូតែលហ្នឹង សាងសង់ព្រះពុទ្ធបដិមា កម្ពស់១០៨ម៉ែត្រ នៅឧទ្យានជាតិបូកគោ»។
ការដែលមានពុទ្ធបដិមាខ្ពស់នេះ គឺជាមោទកភាពមួយរបស់កម្ពុជា ក្នុងនាមជាប្រទេសកាន់ពុទ្ធសាសនា។ មិនតែប៉ុណ្ណោះ ពុទ្ធបដិមាដ៏ខ្ពស់នេះ នឹងជួយប្រែក្លាយ រមណីយដ្ឋានបូកគោ ទៅកន្លែងទេសចរណ៍បែបសាសនា ដ៏មានសក្ដានុពលផងដែរ។ នេះជាការលើកឡើងរបស់លោក នេត្រ ភក្ត្រា ដោយបន្ថែមថា៖ «អ្វីដែលយើងយល់ថាជាមោទកភាពសំខាន់របស់ជាតិនោះ គឺជាទី១ យើងព្រះពុទ្ធដែលមានកម្ពស់ខ្ពស់ជាងគេ ទី២ ឧទ្យានជាតិបូកគោ នឹងប្រែក្លាយទៅជារមណីយទេសចរណ៍សាសនា ដោយសារទីតាំងមានកម្ពស់ខ្ពស់។ ទី៣ ជាផ្នែកមួយនៃការលើកកម្ពស់ការគោរពព្រះពុទ្ធសាសនាក្នុងប្រទេសកម្ពុជាយើង»។
ការសាងសង់ព្រះពុទ្ធបដិមានេះ គ្រោងចំណាយថវិកាប្រមាណ ៣០ ទៅ៤០លានដុល្លារ។ ដោយឡែក ចំពោះ ពេលវាលានៅការសាងសង់ មិនទាន់មានការបញ្ជាក់ច្បាស់លាស់នៅឡើយទេ៕
Tag:
ព្រះពុទ្ធបដិមា
ក្រុមហ៊ុនសុខា
© រក្សាសិទ្ធិដោយ thmeythmey.com
