ក្នុងសុន្ទរកថាមួយនៅទីក្រុងមូស្កូ ប្រធានាធិបតីរុស្ស៊ីថ្លែងថា មិនមានការកំណត់​លើហិរញ្ញវ​ត្ថុ​ដែ​ល​រដ្ឋាភិបាលត្រូវប្រើប្រាស់ដើម្បីផ្គត់ផ្គង់ឱ្យកងកម្លាំងក្នុងយុទ្ធនាការនៅអ៊ុយក្រែនដែលឈានដល់ខែទី១០ហើយនោះ។

 

«ពួកយើងមិនមានការរឹតត្បិតថវិកាឡើយ។ ប្រទេស និងរដ្ឋាភិបាលកំពុងតែផ្ដល់អ្វីគ្រប់យ៉ាងដែល​ទាហានស្នើសុំ»។ លោក ពូទីន បានលើកឡើងបែបនេះរួចបន្តថា ការកេណ្ឌកម្លាំងបម្រុង៣០ម៉ឺន​នាក់​កាលពីខែកញ្ញាមិនបានប្រព្រឹត្តទៅដោយរលូននោះឡើយខណៈជួបប្រទះបញ្ហាផ្សេងៗ។ យ៉ាងណា​មិញ លោក ពូទីន មិនបានបញ្ជាក់ច្បាស់ពីបញ្ហាទាំងនោះ ឡើយ។

 

ស្របពេលជាមួយគ្នានេះ មេដឹកនាំរូបនេះបញ្ជាក់ថា លោកបានស្នើឱ្យក្រសួងការពារជាតិយកចិត្តទុក ដាក់ចំពោះរាល់គំនិតផ្ដួចផ្ដើមរបស់ជនស៊ីវិល រួមទាំងការគិតគូរពីការរិះគន់ និងការឆ្លើយតបឱ្យបាន​ត្រឹមត្រូវ និងទាន់ពេលវេលាចំពោះបញ្ហាទាំងឡាយដែលកងកម្លាំងជួបប្រទះ។ 
 

ខណៈការប្រយុទ្ធនៅតែបន្ត លោក ពូទីន ក៏ទទួលស្គាល់ពីភាពស្មុគស្មាញនៅស្ថានភាព​នៅតំបន់​អ៊ុយក្រែន ទាំងបួនដែលរុស្ស៊ីកំពុងកាន់កាប់។ 

ក្នុងសុន្ទរកថាខាងលើ លោកពូទីនបានកោតសរសើរទាហាន និងប្រមុខការពារជាតិជាវីរបុរស ហើយក៏ឆ្លៀតសង្កត់ធ្ងន់ពីការចាំបាច់ត្រូវយកចិត្តទុកដាក់ជាពិសេសអំពីសារសំខាន់នៃ​ការប្រើប្រា​ស់ដ្រូន​ក្នុង​ជម្លោះនេះ។ លើសពីនេះ លោកអះអាងថា មីស៊ីលអន្តរទ្វីប Sarmat របស់​រុស្ស៊ីដែ​លអា​ច​ផ្ទុក​ក្បាលគ្រាប់​នុយក្លេអ៊ែរ នឹងអាចត្រូវដាក់ពង្រាយនាពេលខាងមុខ៕