ជាតិ
សេដ្ឋកិច្ច
ផ្លូវ ភ្ជាប់ពីស្រុកព្រៃនប់ទៅក្រុងព្រះសីហនុតម្លៃជាង៧០លានដុល្លារ ត្រូវបានដាក់ឱ្យប្រើផ្លូវការ ផ្លូវ តភ្ជាប់ពីស្រុកព្រៃនប់ទៅក្រុងព្រះសីហនុតម្លៃដែលចំណាយពេល២៨កែលម្អឡើងវិញដោយក្រុមហ៊ុន ប្រទេសចិន ត្រូវបានដាក់ឱ្យពលរដ្ឋប្រើប្រាស់ជាផ្លូវការចាប់ពីថ្ងៃទី២២ធ្នូ ឆ្នាំ២០២២តទៅ។ រូបថត៖ ក្រសួងសាធារណការ
× ផ្លូវលេខ១៤៦Bនិងផ្លូវលេខ១៤៨ភ្ជាប់ពីស្រុកព្រៃនប់ទៅក្រុងព្រះសីហនុ ដែលធ្វើដោយក្រុមហ៊ុនចិន ក្នុងរយៈពេល២៨ខែកន្លងមកនេះត្រូវបានដាក់ឱ្យប្រើប្រាស់ជាផ្លូវការ នៅថ្ងៃទី២២ធ្នូ។ការកែលម្អឡើងវិញនូវផ្លូវប្រវែងជាង៤៣គីឡូម៉ែត្រនេះ គឺប្រើប្រាស់ដោយថវិកាសន្សំរបស់រដ្ឋចំនួន៧៦លានដុល្លារអាម៉េរិក។
រដ្ឋាភិបាល បានដាក់ឱ្យពលរដ្ឋប្រើប្រាស់ផ្លូវ២ខ្សែនៅក្នុងខេត្តព្រះសីហនុ។ ផ្លូវទាំង២ខ្សែនោះ មាន
ផ្លូវលេខ១៤៦B ឬ វិថីសុវត្ថិភាពសម្តេចព្រះសង្ឃរាជ ទេព វង្ស ចាប់ពីចំណុចបំបែកផ្លូវជាតិលេខ៤ ត្រង់គីឡូម៉ែត្រលេខ១៧៨+១៦៥ ស្ថិតនៅភូមិវាលធំ ឃុំវាលរេញ ស្រុកព្រៃនប់ ទៅដល់រង្វង់មូលស្ទឹងហាវ ស្ថិតនៅភូមិ១ ឃុំអូរត្រេះ ស្រុកស្ទឹងហាវ និងផ្លូវលេខ១៤៨ ឬ តីរវិថីសម្តេចតេជោ ហ៊ុន សែន បន្តពីរង្វង់មូលស្ទឹងហាវ ដល់ចំណុចប្រសព្វផ្លូវជាតិលេខ៤ ត្រង់គីឡូម៉ែត្រលេខ ២២៥+៥៥០ កំពង់ផែស្វយ័តក្រុងព្រះសីហនុ។
ផ្លូវទាំង២ខ្សែនេះ ត្រូវបានស្ថាបនាឡើងវិញទៅតាមលក្ខណៈបច្ចេកទេស និងបែងចែកជា២ប្រភេទ។ ក្នុងនោះមាន កំណាត់ផ្លូវប្រវែងជិត២១គីឡូម៉ែត្រ កែលម្អដោយក្រាលបេតុងកៅស៊ូAC កម្រាស់ ៩សង់ទីម៉ែត្រ មានទទឹងតួផ្លូវ១១ម៉ែត្រ និង កំណាត់ផ្លូវប្រវែងជាង២២គីឡូម៉ែត្រទៀត ត្រូវបានស្ថាបនាដោយក្រាលបេតុងសរសៃដែក កម្រាស់ ២៦សង់ទីម៉ែត្រ ទទឹងតួផ្លូវ១១ម៉ែត្រ។ ក្រៅពីនេះ ក៏មានការសាងសង់សំណង់សិល្បការ្យផ្សេងៗទៀត ដូចជា ធ្វើស្ពានថ្មី១កន្លែង និងពង្រីកស្ពានចាស់ ១៧កន្លែង ព្រមទាំងដាក់លូគ្រប់ប្រភេទចំនួន ១៦១កន្លែង។
ក្នុងពិធីសម្ពោធដាក់ឲ្យប្រើប្រាស់ផ្លូវលេខ១៤៦B និងផ្លូវលេខ១៤៨ តម្លៃ៧៦លានដុល្លារ នាព្រឹកថ្ងៃទី២២ធ្នូ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងថា ផ្លូវទាំងពីរខ្សែនេះ គឺជាខ្សែផ្លូវវាងក្រុងតភ្ជាប់គ្នា ដ៏មានសក្តានុពលដែលតភ្ជាប់ពីទីប្រជុំជនទៅជាយក្រុង ទៅកាន់តំបន់ទេសចរណ៍ និងឆ្នេរធម្មជាតិ ព្រមទាំងតភ្ជាប់ជាមួយផ្លូវជាតិលេខ៤ ផ្លូវល្បឿនលឿនភ្នំពេញ-ក្រុងព្រះសីហនុ និងផ្លូវទាំង ៣៧ខ្សែ នៅក្រុងព្រះសីហនុផងដែរ។ បើតាមលោក ស៊ុន ចាន់ថុល ផ្លូវនេះដើរតួនាទីយ៉ាងសំខាន់ដល់ការដឹកជញ្ជូន ការធ្វើដំណើរ និងបម្រើដល់វិស័យទេសចរណ៍ ក៏ដូចជាលើកកម្ពស់ការតភ្ជាប់ខេត្តភាគនិរតីនេះ ឱ្យកាន់តែមានភាពប្រទាក់ក្រឡាគ្នា និងកាន់តែងាយស្រួលក្នុងការដឹកជញ្ជូនទំនិញគ្រប់ប្រភេទ ឆ្ពោះទៅតំបន់ឧស្សាហកម្ម រោងចក្រ តំបន់សេដ្ឋកិច្ចពិសេស កំពង់ផែស្ទឹងហាវ និងកំពង់ផែស្វយ័តក្រុងព្រះសីហនុ។
លោករដ្ឋមន្ត្រីក្រសួងសាធារណការ បានបញ្ជាក់ថាគម្រោងស្ថាបនាផ្លូវខាងលើត្រូវបានបើកការដ្ឋានសាងសង់កាលពីអំឡុងខែមេសា ឆ្នាំ២០២០ និងបញ្ចប់ជាស្ថាពរនៅក្នុងខែសីហា ឆ្នាំ២០២២។ ផ្លូវនេះ សាងសង់ដោយក្រុមហ៊ុនសាជីវកម្មស្ពាននិងថ្នល់ចិន (CRBC) និងត្រួតពិនិត្យបច្ចេកទេសដោយក្រុមការងារបច្ចេកទេសនៃក្រសួងសាធារណការ និងដឹកជញ្ជូន៕
© រក្សាសិទ្ធិដោយ thmeythmey.com