ការហោះហើររបស់ដ្រូនកូរ៉េខាងជើងចូលដែនអាកាសកូរ៉េខាងត្បូង ធ្វើឱ្យយោធាកូរ៉េខាងត្បូងបាក់មុខយ៉ាងខ្លាំង ព្រោះបរាជ័យបាញ់ទម្លាក់ដ្រូនមួយក្នុងចំណោមដ្រូនចំនួន៥ដែលកូរ៉េខាងជើង​បាន​បញ្ជូន​ឆ្លងកាត់ខ្សែបន្ទាត់ព្រំដែនកាលពីថ្ងៃទី ២៦ ខែធ្នូ ឆ្នាំ ២០២២។ ការណ៍នេះ​ធ្វើ​ឱ្យ​មាន​សំណួរ​ពាក់​ព័ន្ធ​នឹងសមត្ថភាពការពារដែនអាកាសរបស់កូរ៉េខាងត្បូងថែមទៀត។ មិនត្រឹមអាចហោះចូលកូរ៉េខាងត្បូងឡើយ ដ្រូនកូរ៉េខាងជើងថែមទាំងហោះទៅកៀកតំបន់ហាមហោះហើរក្នុងទីក្រុងសេអ៊ូលថែមទៀត។

 

«វាបានហោះចូលទៅក្នុងតំបន់ដែនអាកាសភាគខាងជើង ប៉ុន្តែវាមិនបានចូលទៅជិតកន្លែង​សន្តិសុខ​សំខាន់នោះឡើយ»។ មន្ត្រីយោធាកូរ៉េខាងត្បូងបានប្រាប់ទីភ្នាក់ងារព័ត៌មាន Yonhap បែបនេះ ដោយសំដៅតំបន់គ្មានការហោះហើរដែលគ្របដណ្ដប់ការិយាល័យប្រធានាធិបតីកូរ៉េខាងត្បូង។

 

ក្នុងសន្និសីទមួយក្នុងថ្ងៃដដែល មន្ត្រីយោធាកូរ៉េខាងត្បូងម្នាក់បានអះអាងស្រដៀងគ្នាផងដែរ ប៉ុន្តែ​សង្កត់ធ្ងន់ថា មិនមានបញ្ហាណាមួយទាក់ទងសន្តិសុខនៃការិយាល័យប្រធានាធិបតីនៅសង្កាត់ Yongsan ក្រុងសេអ៊ូលនោះឡើយ។ មន្ត្រីដដែលនេះ បានច្រាលចោលពាក្យចចាមអារ៉ាប់ជុំវិញព័ត៌មានដែលដ្រូនអាចបានថតរូបភាពការិយាល័ប្រធានាធិបតី និងទីតាំងសំខាន់នៅជិតនោះដូចជា អគ្គសេនាធិការដ្ឋាន (JCS) ជាដើម៕