ជាតិ
រូបភាពនិស្សិតកសិកម្ម នៃសាកលវិទ្យាល័យភូមិន្ទកសិកម្ម។ រូបតំណាង
×![]()
ភ្នំពេញ៖ ក្នុងឆ្នាំ២០២២កន្លងទៅ មាននិស្សិតកសិកម្មចំនួន ២៥០នាក់ បានទៅហាត់ការរយៈពេល១១ខែ នៅសាធារណរដ្ឋអ៊ីស្រាអែល។ និស្សិតទាំងនោះ ជានិស្សិតនៃសាកលវិទ្យាល័យភូមិន្ទកសិកម្ម, សាកលវិទ្យាល័យ ហេង សំរិន ត្បូងឃ្មុំ, វិទ្យាស្ថានជាតិកសិកម្មកំពង់ចាម, សាកលវិទ្យាល័យស្វាយរៀង និងសាកលវិទ្យាល័យគ្រប់គ្រង និងសេដ្ឋកិច្ចបាត់ដំបង។
ចាប់តាំងពីឆ្នាំ ២០០៨មក កម្ពុជាបានបញ្ជូននិស្សិតជាង ១៧០០នាក់ ទៅហាត់ការលើជំនាញកសិកម្មនៅប្រទេសអ៊ីស្រាអែល តាមរយៈកិច្ចសហប្រតិបត្តិការជាមួយក្រុមហ៊ុន Agrostudies Agriculture Capacity Building។ និស្សិតកម្ពុជា ដែលបានទៅហាត់ការនៅទីនោះ ភាគច្រើនត្រូវបានបណ្ដុះបណ្ដាលទាក់ទងនឹងចំណេះដឹងបច្ចេកទេសកសិកម្មទាំងទ្រឹស្ដី និងការអនុវត្ត។
លោក ពិន ធីរ៉ា ប្រធានការិយាល័យទំនាក់ទំនងអន្តរជាតិ នៃសាកលវិទ្យាល័យភូមិន្ទកសិកម្ម បានប្រាប់សារព័ត៌មាន Thmey Thmey 25 តាមទូរសព្ទថា ក្នុងឆ្នាំ២០២២ ចំនួននិស្សិតទៅហាត់ការនៅប្រទេសអ៊ីស្រាអែល មានចំនួន ២៥០នាក់ ដែលកើនឡើងជាងឆ្នាំមុនៗ។ លោក បន្តថា ការជ្រើសរើសនិស្សិតទៅហាត់ការនេះ ផ្ដល់សម្រាប់និស្សិតសិក្សាឆ្នាំទី៣ ដែលមានសុខភាពមាំមួន និងចំណេះដឹងភាសាអង់គ្លេសអាចទំនាក់ទំនងបាន។
ក្នុងចំណោមនិស្សិតទាំង២៥០នាក់ ដែលទៅហាត់ការនៅប្រទេសអ៊ីស្រាអែល មាននិស្សិតស្រីជាង ៣០នាក់។ និស្សិតទាំងនោះ ជានិស្សិតសិក្សានៅសាកលវិទ្យាល័យភូមិន្ទកសិកម្ម, សាកលវិទ្យាល័យ ហេង សំរិន ត្បូងឃ្មុំ, វិទ្យាស្ថានជាតិកសិកម្មកំពង់ចាម, សាកលវិទ្យាល័យស្វាយរៀង និងសាកលវិទ្យាល័យគ្រប់គ្រង និងសេដ្ឋកិច្ចបាត់ដំបង។
តាមការស្ទង់មតិរបស់សាកលវិទ្យាល័យភូមិន្ទកសិកម្មកន្លងមក និស្សិតដែលធ្លាប់ទៅហាត់ការនៅអ៊ីស្រាអែល ភាគច្រើនបានយកចំណេះដឹងទៅធ្វើការលើវិស័យកសិកម្ម និងខ្លះបង្កើតជាកសិដ្ឋានដោយខ្លួនឯង។ លោក ពិន ធីរ៉ា ប្រធានការិយាល័យទំនាក់ទំនងអន្តរជាតិ សង្ឃឹមថា នៅឆ្នាំ២០២៣នេះ និស្សិតកសិកម្មកម្ពុជា អាចទៅហាត់ការនៅអ៊ីស្រាអែល ប្រសិនបើអ៊ីស្រាអែល បន្តជ្រើសរើស៕
© រក្សាសិទ្ធិដោយ thmeythmey.com
