លោក ហ៊ុន ម៉ានី បានថ្លែងក្នុងពិធីបើកព្រឹត្តិការណ៍ប្រកួតពានរង្វាន់ Soccer League ដោយចាត់ទុកថាជាការចូលរួមចំណែកអភិវឌ្ឍសង្គម តាមរយៈការប្រើប្រាស់សកម្មភាពកីឡា។ កីឡាករថា្នល និងយុវជន ដែលមិនមែនជាកីឡាករ មានឱកាសបង្ហាញទេព្យកោសល្យ ក្នុងកីឡាបាល់ទាត់ ម្យ៉ាងវិញទៀត ក៏ជាការពង្រឹងចំណងមិត្តភាព សាមគ្គីភាពរវាងស្ថាប័នរដ្ឋ និង​ឯកជន។ ប្រធានរូបនេះ បាននិយាយដូច្នេះថា៖«ការប្រកួតពានរង្វាន់ Soccer League ផ្ដល់ឱកាសដល់យុវជនកម្ពុជា និងការជួបជុំរឹតចំណងមិត្តភាព សាមគ្គីភាព និងបង្កើតកិច្ចសហប្រតិបត្តិការ រវាងគ្នា និងគ្នា តាមរយៈវិស័យកីឡា បន្ទាប់ពីភាពស្រាកស្រាម នៃជំងឺកូវីដ-១៩។»។  

ក្នុងពិធីបើកនេះ លោក ថោង ខុន ប្រធានគណៈកម្មាធិការជាតិអូឡាំពិកកម្ពុជា ក៏បានវាយតម្លៃខ្ពស់ចំពោះ ស.ស.យ.ក ក្នុងការផ្ដួចផ្ដើមធ្វើព្រឹត្តិការណ៍កីឡានេះ ហើយបានចាត់ទុកថាជាការរួមចំណែកពង្រឹង និងជំរុញវិស័យកីឡានៅកម្ពុជា តាមរយៈសកម្មភាពរៀបចំការប្រកួតកីឡានានា តាមរាជធានី ខេត្ត-ក្រុង។

«ការប្រកួត Soccer League មិនត្រឹមតែជាសកម្មភាពកីឡា តែមួយមុខទេ ប៉ុន្ដែក៏ជាការសាងសុខដុមរមនាសង្គម ពង្រឹង់សាមគ្គីភាព និងមិត្តភាព ក្នុងចំណោមអង្គភាព ស្ថាប័ន ក្រសួងនានា។ វិស័យកីឡាបាន ដើរតួរនាទីយ៉ាងសំខាន់  ក្នុងការទំនាក់ទំនងសង្គម និងការសាងធនធានមនុស្សល្អ សម្រាប់ដំណើរការអភិវឌ្ឍសេដ្ឋកិច្ចសង្គម។ វិស័យកីឡាកីឡា ក៏ដើរតួនាទីសំខាន់ក្នុងការពង្រឹងសុខភាពផ្លូវកាយ និងសុខភាពផ្លូវចិត្ត បង្កើតឥទ្ធិភាពការងារ កាត់បន្ថយភាពតាន់តឹង ក្នុងអារម្មណ៍ លើកកំពង់គុណភាពជីវិត និងសុភមង្គលគ្រួសារ និងការរួមចំណែកយ៉ាងសំខាន់ ក្នុងការប្រយុទ្ធប្រឆាំងទប់ស្កាត់បញ្ហាសង្គម ដូចជាការកាត់បន្ថយបញ្ហាប្រើប្រាស់គ្រឿងញៀន និងសារធាតុញៀន ដែលបង្ករហានីភ័យធ្ងន់ធ្ងដល់សុខភាព ​និងសង្គមជាតិ។»។ លោក ថោង ខុន បានថ្លែងដូច្នេះក្នុងពិធីបើកការប្រកួតនេះ

ប្រធានគណៈកម្មាធិការជាតិអូឡាំពិកកម្ពុជា ក៏បានស្នើរឲ្យកីឡាករ កីឡាការិនី អ្នកចូលរួមទាំងអស់គោរពវិន័យ និងគោលការណ៍ប្រកួតឲ្យបានត្រឹមត្រូវ, មានស្មារតីយោគយល់អធ្យាស្រ័យគ្នា ទៅវិញទៅមក និងចាត់ទុកការប្រកួតនេះ គឺជាការបង្កើតភាពសប្បាយរីករាយ ដើម្បីសុខភាព មិត្តភាព និងសាមគ្គីភាព។

គួរបញ្ជាក់ផងដែរថា  ការប្រកួតបាល់ទាត់ពានរង្វាន់ Soccer League លើកទី៦ ឆ្នាំ ២០២៣​ មានក្រុមចូលរួមចំនួន ៧៤ក្រុម កើនឡើងចំនួន ២ដងខុសពីឆ្នាំ​ ២០១៩។ ក្នុងចំណោម ៧៤ក្រុមនោះ ក៏មានក្រុមបាល់ទាត់នារី ១០ក្រុម ដោយត្រូវប្រកួតចែកចេញជា ២ពូល៕