បាតុករ ដែលគាំទ្រលោក ជែ បុលសូណារ៉ូ បានចូលគ្រប់គ្រងវិមានប្រធានាធិបតី សភា និងតុលាការកំពូលប្រេស៊ីល ដែលស្ថិតនៅក្នុងក្រុងប្រាស៊ីលីយ៉ា ក្រោយលោក Luiz Inacio Lula da Silva ទើបចូលកាន់តំណែងបានជាងមួយសប្តាហ៍។ ក្នុងថ្ងៃទី៨ ខែមករា កម្លាំងសន្តិសុខ បានពង្រាយ​ ហើយថែមទាំងបានបាញ់ទឹក និងបាញ់គ្រាប់បែកមានផ្ទុកឧស្ម័នបង្ហូរទឹកភ្នែកពីឧទ្ធម្ភាគចក្រ ដើម្បីបំបែកកុបកម្មមួយនេះ។ 

 

ដោយសារស្ថានភាពធ្ងន់ធ្ងរ លោក Lula ដែលកំពុងស្ថិតនៅ ក្រុង Araraquara ដើម្បីត្រួតពិនិត្យស្ថានភាពទឹកជំនន់ បានចុះហត្ថលេខាលើក្រឹត្យមួយ ដើម្បីស្តារស្ថិរភាព សណ្តាប់ធ្នាប់ និងច្បាប់នៅក្នុងក្រុង ប្រាស៊ីលីយ៉ា ឡើងវិញ។ 

 

«ក្រុមមនុស្សផ្តាច់ការទាំងនេះ បានធ្វើឡើង ដែលមិនធ្លាប់កើតមានពីមុនមកនៅក្នុងប្រវត្តិសាស្រ្តរបស់ប្រទេស»។ ប្រធានាធិបតីប្រេស៊ីល ដែលទើបចូលកាន់តំណែងបានជាង១សប្តាហ៍​ បានបញ្ជាក់បែបនេះ ដោយបន្តថា អាជ្ញាធរនឹងស្វែងរកជនបង្ករឿង និងបំផ្លាញទ្រព្យសម្បត្តិ ហើយក្រុមបាតុករទាំងនោះ នឹងត្រូវបានបង្រ្កាបដោយកម្លាំងសន្តិសុខ។ សារព័ត៌មានប្រេស៊ីលបានចុះផ្សាយថា ប៉ូលិសបានចាប់ខ្លួនមនុស្សចំនួន ១៧០នាក់ ខណៈទីភ្នាក់ងារសន្តិសុខសភា បានចាប់ខ្លួនបាតុករយ៉ាងហោចណាស់ ៣០រូប។ 

 

កុបកម្ម ដែលឈានទៅដល់ការអុកឡុកនៅវិមានប្រធានាធិបតី សភា និងតុលាការកំពូលនេះ ធ្វើឡើងក្រោយហេតុផលការបោះឆ្នោតមានការក្លែងបន្លំ។ លោក Lula បានឈ្នះការបោះឆ្នោតជុំចុងក្រោយទល់នឹងលោក បុលសូណារ៉ូ ក្នុងសំឡេង ៥០,៩ភាគរយ និង៤៩,១ភាគយ។ ក្នុងកិច្ចសម្ភាសជាមួយទីភ្នាក់ងារព័ត៌មាន AFP បាតុករប្រេស៊ីលមួយរូប បានទាមទារឱ្យពិនិត្យការបោះឆ្នោតដែលមានការក្លែងបន្លំឡើងវិញ។ 

 

ស្របពេលមានបាតុកម្មនៅក្នុងសភា វិមានប្រធានាធិបតី និងតុលាការកំពូលបែបនេះ អភិបាលក្រុង ប្រាស៊ីលីយ៉ា បានបណ្តេញប្រធានសន្តិសុខសាធារណរបស់រដ្ឋធានី លោក Anderson Torres ដែលជាអតីតរដ្ឋមន្រ្តីយុត្តិធម៌ក្នុងអាណត្តិ លោក បុលសូណារ៉ូ។ 

 

ក្រោយការបណ្តេញនេះ អគ្គរដ្ឋអាជ្ញាបានស្នើសុំឱ្យតុលាការកំពូលចេញដីការចាប់ខ្លួន ដើម្បីចាប់លោក Torres និងមន្រ្តីផ្សេងទៀត ដែលនាំឱ្យមានអស្ថិរភាពនៅក្នុងក្រុង។ បន្ថែមពីនេះ អគ្គរដ្ឋអាជ្ញា ក៏បានស្នើឱ្យតុលាការកំពូល ចេញដីកាប្រើអាជ្ញាធរសន្តិសុខសាធារណៈទាំងអស់ ដើម្បីយកសភា វិមានប្រធានាធិបតី និងតុលាការកំពូល ពីការគ្រប់គ្រងរបស់ក្រុមបាតុករមកវិញផង។ 

 

មកទល់ពេលនេះ កម្លាំងសន្តិសុខប្រេស៊ីល បានដណ្តើមវិមានប្រធានាធិបតី សភា​ និងតុលាការកំពូលមកវិញហើយ៕