សហភាពអឺរ៉ុប កន្លងមក បានដាក់ចេញគម្រោងឈប់ប្រើប្រាស់ឥន្ធនៈផលិតចេញពីប្រេងដូង នៅត្រឹមឆ្នាំ២០៣០ ក្រោមហេតុផលដំណាំដូងប្រេង ធ្វើឱ្យមានការកាប់បំផ្លាញព្រៃឈើ។ យ៉ាងណាមិញ ឥណ្ឌូណេស៊ី និងម៉ាឡេស៊ី បានប្តេជ្ញាប្រឆាំងនឹងការរើសអើងផលិតផលប្រេងដូងរបស់ខ្លួន។ 

 

ក្រោយពីជំនួបជាលើកដំបូងជាមួយនាយករដ្ឋមន្រ្តីម៉ាឡេស៊ី អាន់វ៉ា អ៊ីប្រាហ៊ីម ដែលទើបឡើងកាន់តំណែងនៅឥណ្ឌូណេស៊ី និងបានធ្វើទស្សនកិច្ចនៅឥណ្ឌូណេស៊ីលើកដំបូង ប្រធានាធិបតីឥណ្ឌូណេស៊ី លោក ចូកូ វីដូដូ​ បានអះអាងថា ប្រទេសទាំងពីរនឹងប្រឆាំងនឹងការរើសអើងប្រេងដូង និងពង្រឹងកិច្ចសហប្រតិបត្តិការជាមួយក្រុមប្រឹក្សានៃប្រទេសផលិតប្រេងដូង ដើម្បីលើកឡើងពីបញ្ហាប្រឈម។ 

 

ឥណ្ឌូណេស៊ី និងម៉ាឡេស៊ី ជាប្រទេសដែលនាំចេញប្រេងដូងធំជាងគេបំផុតនៅលើពិភពលោក។ នៅក្នុងឆ្នាំ២០២១ ឥណ្ឌូណេស៊ី បាននាំចេញប្រេងដូងចំនួន ២៦,៩លាន មេទ្រីកតោន។ ចំណែកម៉ាឡេស៊ី នាំចេញប្រេងដូងចំនួន ១៦,២១មេទ្រីកតោន នៅក្នុងឆ្នាំ២០២០។ នេះបើផ្អែកតាមទិន្នន័យរបស់ Statista។ 

 

ក្រៅពីបញ្ហាដូចប្រេង មេដឹកនាំទាំងពីរក៏បានជជែកពីស្ថានការណ៍នយោបាយនៅមីយ៉ាន់ម៉ាផង ស្របពេលឥណ្ឌូណេស៊ី បានកាន់តំណែងជាប្រធានផ្លាស់វេនរបស់អាស៊ាននៅក្នុងឆ្នាំ២០២៣។ ក្នុងកិច្ចសន្ទនា មេដឹកនាំប្រទេសជិតខាងទាំងពីរ បានជំរុញឱ្យយោធាមីយ៉ាន់ម៉ា គោរពតាមការឯកភាពទាំង៥ ដែលដាក់ចេញមេដឹកនាំអាស៊ាននាពេលកន្លងមក។ 

 

បន្ថែមពីនេះ លោកអាន់វ៉ា និងវីដូដូ បានចុះហត្ថលេខាលើអនុស្សរណៈនៃការយោគយល់គ្នាចំនួន ៨ផងដែរ លើវិស័យដឹកជញ្ជូន ថាមពលស្អាត ការអភិវឌ្ឍ និងវិស័យផ្សេងទៀត៕