លោកប្រាយុទ្ធ ចន្ទអូចា នាយករដ្ឋមន្រ្តីថៃ ក្នុងថ្ងៃទី៩ ខែមករា បានចូលរួមជាមួយ «បក្សរួមថៃសាងជាតិ» ហើយក្លាយជាបេក្ខភាពនាយករដ្ឋមន្រ្តី ដើម្បីត្រៀមខ្លួនសម្រាប់ការបោះឆ្នោតថ្នាក់ជាតិនាពេលខាងមុខ។ ក្នុងពិធីជួបជុំអ្នកគាំទ្រនៅមជ្ឈមណ្ឌលសន្និបាតជាតិ Queen Sirikit លោកប្រាយុទ្ធបានប្រាប់ថា លោកមិនចង់បានអំណាច ឬផលប្រយោជន៍សម្រាប់ខ្លួនឯងឡើយ។ 

 

«ខ្ញុំគោរពដំណើរប្រជាធិបតេយ្យរបស់ប្រទេស ហើយនេះជាហេតុផលខ្ញុំនៅទីនេះ»។ លោកប្រាយុទ្ធ បានសង្កត់ធ្ងន់បែបនេះ ដោយបន្តថា ថៃត្រូវតែមានការវិវដ្តប្រកបដោយស្ថិរភាព សន្តិសុខ និងកំណើនសេដ្ឋកិច្ច។ ត្រង់ចំណុចនេះ ប្រមុខរដ្ឋាភិបាលថៃ បានប្តេជ្ញាដោះស្រាយបញ្ហាប្រឈមជាច្រើនទៀត ដែលថៃកំពុងជួបប្រទះ ប្រសិនបើលោកកាន់តំណែងនេះបន្តទៀត។​ បើតាមលោកប្រាយុទ្ធ សូមទុកឱ្យប្រជាជនអ្នកសម្រេចពីមេដឹកនាំរបស់ប្រទេសទៅចុះ។ 

 

លោកប្រាយុទ្ធបានលើកឡើងថា បញ្ហាដីធ្លី ការកើនឡើងនៃចំណាយថ្លៃរស់នៅ អយុត្តិធម៌ និងអំពើពុករលួយ គឺសុទ្ធតែស្ថិតក្នុងបញ្ហាដែលលោកចង់ដោះស្រាយ។ នេះបើតាមការចុះផ្សាយរបស់កាសែតបាងកកប៉ុស្តិ៍។ 

 

ជុំវិញការចូលរួមជាមួយបក្សរួមថៃនេះ លោកប្រាយុទ្ធបានថ្លែងថា លោកមានបំណងចង់ចូលរួម៤ ឬ៥ខែមកហើយ ហើយលោកសង្ឃឹមថា ការសម្រេចចិត្តមួយនេះ នឹងជួយឱ្យលោកអាចលើកឡើងពីបញ្ហាខាងលើ និងជួយពង្រឹងការបង្រួមបង្រួមប្រទេស ដែលប្រឈមនឹងបញ្ហាសកល។ 

 

សូមបញ្ជាក់ថា ថៃគ្រោងរៀបចំការបោះឆ្នោតថ្នាក់ជាតិនៅថ្ងៃទី៧ ខែឧសភា ឆ្នាំ២០២៣ខាងមុខ ក្រោយរដ្ឋសភាបញ្ចប់អាណត្តិរបស់ខ្លួនត្រឹមថ្ងៃទី២៣ ខែមីនា៕