ជាតិ
ថ្នាក់ដឹកនាំប្រទេសមេគង្គជួបប្រជុំកំពូលលើកទី៤នៅវៀងចន្ទន៍ខែមេសា ដើម្បីឆ្លើយតបបញ្ហាប្រឈមនានា មេដឹកនាំនៃបណ្តាប្រទេសមេគង្គ នាកិច្ចប្រជុំកំពូលលើកទី៣នៅសៀមរាប កាលពីខែមេសា ឆ្នាំ២០១៨។ រូបថត MRC
× ប្រមុខរដ្ឋាភិបាលនៃបណ្តាប្រទេសជាសមាជិកគណៈកម្មការទន្លេមេគង្គ (MRC) នឹងជួបគ្នានាកិច្ចប្រជុំកំពូលលើកទី៣ និងសន្និសីទអន្តរជាតិរបស់ MRC ពីថ្ងៃទី២ ដល់ថ្ងៃទី៥ ខែមេសា ខាងមុខ នៅក្រុងវៀងចន្ទន៍ ប្រទេសឡាវ។ នេះបើតាមសេចក្តីប្រកាសព័ត៌មានរបស់ MRC នៅថ្ងៃទី១០ ខែមករា ដោយកិច្ចប្រជុំនឹងផ្តោតលើការកំណត់ជោគវាសនារបស់អាងទន្លេមេគង្គ។
បញ្ហាប្រឈមនានាដោយរាប់ចាប់តាំងពីផលវិបាកនៃការអភិវឌ្ឍន៍ពាក់ព័ន្ធនឹងទឹក រហូតដល់ការប្រែប្រួលអាកាសធាតុ កំពុងជះឥទ្ធិពលដល់ទន្លេមេគង្គ ដែលជាមធ្យោបាយផ្លូវទឹកធំជាងគេបំផុតនៅតំបន់អាស៊ីអាគ្នេយ៍។ ទាំងនេះជាបញ្ហាដែលមេដឹកនាំនយោបាយកម្រិតខ្ពស់របស់កម្ពុជា ឡាវ ថៃ និងវៀតណាម រួមទាំងគណៈប្រតិភូជាន់ខ្ពស់ពីដៃគូសន្ទនារបស់ MRC ពោលគឺចិន និងមីយ៉ាន់ម៉ា ត្រូវបន្តស្វែងរកគន្លឹះរួមគ្នាដោះស្រាយ។
«ទន្លេមេគង្គកំពុងបានឆ្លងកាត់នូវការផ្លាស់ប្តូរយ៉ាងសម្បើម។ យើងត្រូវតែច្នៃប្រឌិតឥតឈប់ឈរទាំងនៅក្នុងផ្នែកគោលនយោបាយ យុទ្ធសាស្ត្រ និងបច្ចេកវិទ្យាដើម្បីនាំឲ្យការគ្រប់គ្រង និងអភិវឌ្ឍន៍អាងទន្លេមេគង្គកាន់តែមានទំនួលខុសត្រូវ និងប្រកបដោយចីរភាព»។ នេះជាការលើកឡើងរបស់បណ្ឌិត អានុល័ក ខិធិឃួន (Anoulak Kittikhoun) នាយកប្រតិបត្តិនៃលេខាធិការដ្ឋាន MRC។
សេចក្តីប្រកាសព័ត៌មានដដែល បានបញ្ជាក់ថា កិច្ចប្រជុំកំពូលលើកទី៤ ដែលនាំមុខដោយសន្និសីទអន្តរជាតិ ផ្តោតលើប្រធានបទ «នវានុវត្តន៍ និងកិច្ចសហប្រតិបត្តិការសម្រាប់សន្តិសុខទឹក និងទន្លេមេគង្គប្រកបដោយចីរភាព»។ សន្និសីទនេះ ត្រូវបានរំពឹងថា នឹងមានការចូលរួមពីភាគីពាក់ព័ន្ធ ជំនាញការ និងអ្នកចាប់អារម្មណ៍ ប្រមាណ៤០០នាក់។
សារសំខាន់ៗ និងអនុសាសន៍នានាដែលបានពីសន្និសីទពីថ្ងៃទី២ ដល់ថ្ងៃទី៣ ខែមេសា នឹងត្រូវដាក់ចូលសម្រាប់ការពិភាក្សាក្នុងកិច្ចប្រជុំកំពូលលើកទី៤ ដើម្បីកំណត់ពីអនាគត និងទិសដៅយុទ្ធសាស្ត្រសម្រាប់ទន្លេមេគង្គ ដូចកិច្ចប្រជុំកំពូល៣លើកកន្លងមក ដោយឆ្នាំ២០១០ រៀបចំនៅប្រទេសថៃ ឆ្នាំ២០១៤នៅវៀតណាម និងឆ្នាំ២០១៨នៅកម្ពុជា។
គណៈកម្មការទន្លេមេគង្គ (MRC) ជាស្ថាប័នអន្តររដ្ឋាភិបាលដែលត្រូវបានបង្កើតឡើងកាលពីឆ្នាំ១៩៩៥។ ស្ថាប័ននេះ បំពេញតួនាទីជាវេទិកាថ្នាក់តំបន់សម្រាប់ការទូតទឹក និងជាមជ្ឈមណ្ឌលចំណេះដឹង ដោយអនុវត្តតាមកិច្ចព្រមព្រៀងទន្លេមេគង្គក្នុងចំណោមប្រទេសកម្ពុជា ឡាវ ថៃ និងវៀតណាម៕
© រក្សាសិទ្ធិដោយ thmeythmey.com