អន្តរជាតិ
×![]()
ដោយ: ងួន សុភាវត្តី
ចាប់ពីខែមិថុនា ថៃនឹងចាប់ផ្តើមប្រមូលប្រាក់៣០០បាតដែលស្មើនឹង៩ដុល្លារពីភ្ញៀវទេសចរបរទេសដែលចូលប្រទេសខ្លួន។ ប្រាក់៣០០បាតនេះ នឹងចូលរួមចំណែកជាផ្នែកមួយសម្រាប់ជួយដល់ភ្ញៀវទេសចរពេលមានបញ្ហាពាក់ព័ន្ធនឹងគ្រោះថ្នាក់ និងដើម្បីអភិវឌ្ឍគោលដៅទេសចរណ៍ក្នុងប្រទេស។ 
ទេសចរណ៍ ជាវិស័យដ៏សំខាន់មួយសម្រាប់ប្រទេសថៃដែលជាប្រទេសមានសេដ្ឋកិច្ចធំទីពីរក្នុងតំបន់អាស៊ីអាគ្នេយ៍។ វិស័យទេសចរណ៍ក៏បានរួមចំណែកប្រហែល១២ភាគរយនៃផលិតផលក្នុងស្រុកសរុបរបស់ថៃមុនពេលជំងឺកូវីដ-១៩ផងដែរ។
បើតាមរដ្ឋមន្ត្រីក្រសួងទេសចរណ៍ថៃ Phiphat Ratchakitprakarn ជនបរទេសដែលចូលក្នុងប្រទេសថៃនឹងត្រូវយកប្រាក់៩ដុល្លារលើកលែងតែជនបរទេសដែលមានប័ណ្ណការងារ និងជនបរទេសដែលចូលក្នុងប្រទេសថៃរយៈពេលខ្លីប៉ុណ្ណោះ។ លោកក៏បានបញ្ជាក់ថា ថៃរំពឹងថានឹងមានភ្ញៀវទេសចរចំនួន២៥លាននាក់នៅឆ្នាំនេះ។
លោក Phiphat ក៏បានបន្ថែមថា ការចំណាយលើវិស័យទេសចរណ៍ក្នុងឆ្នាំនេះត្រូវបានព្យាករថានឹងឡើងដល់យ៉ាងហោចណាស់២,៣៨ពាន់ពាន់លានបាត។
គួរបញ្ជាក់ថា សំណើនេះត្រូវបានយកមកពិចារណាជាលើកដំបូងកាលពីឆ្នាំមុន និងកំពុងរង់ចាំការអនុម័តពីគណៈរដ្ឋមន្ត្រី។ កាលពីឆ្នាំ ២០១៩ កន្លងទៅថៃបានស្វាគមន៍ភ្ញៀវទេសចរបរទេសជាង៤០លាននាក់៕
Tag:
ថៃ
© រក្សាសិទ្ធិដោយ thmeythmey.com
