អន្តរជាតិ
សមាជិកសភាអាល្លឺម៉ង់៖ អាល្លឺម៉ង់នឹងមិនផ្ដល់សព្វាវុធឱ្យកោះតៃវ៉ាន់នោះឡើយ ប្រធានាធិបតីតៃវ៉ាន់ Tsai Ing-wen ចាប់ដៃសមាជិកសភាអាល្លឺម៉ង់ Marie-Agnes Strack-Zimmermann។ រូបថត AFP
× អាល្លឺម៉ង់នឹងមិនផ្ដល់ ហើយក៏មិនបានទទួលការស្នើណាមួយឱ្យបញ្ជូនសព្វាវុធទៅកាន់កោះតៃវ៉ាន់នោះឡើយ ខណៈស្ថានភាពនៅកោះនេះខុសគ្នានឹងស្ថានភាពនៅអ៊ុយក្រែន។ ប្រធានគណៈកម្មាធិការការពារជាតិរបស់សភាអាល្លឺម៉ង់លោកស្រី Marie-Agnes Strack- Zimmermann លើកឡើងបែបនេះ នៅថ្ងៃទី១១ ខែមករា អំឡុងដំណើរទស្សនកិច្ចនៅទីក្រុងតៃប៉ិ។
លោកស្រី Strack-Zimmermann ដែលជាសមាជិកសភាជាន់ខ្ពស់ និងជាសមាជិកគណបក្សប្រជាធិបតេយ្យសេរី (FDP) បានលើកឡើងក្នុងសន្និសីទកាសែតមួយនៅទីក្រុងតៃប៉ិថា អាល្លឺម៉ង់បានផ្ដល់ជំនួយយោធាជាច្រើនទៅកាន់អ៊ុយក្រែន។ ប៉ុន្តែរឿងបែបនេះ នឹងមិនកើតឡើងចំពោះតៃវ៉ាន់ឡើយ។
«ស្ថានភាពនៅទីនេះគឺខុសគ្នា។ តួនាទីពួកយើងនៅទីនេះមិនសូវទាក់ទងនឹងយោធាឡើយ។ វាទាក់ទងនឹងសេដ្ឋកិច្ច»។ លោកស្រី Strack-Zimmermann លើកឡើងបែបនេះរួចបន្តថា អាល្លឺម៉ង់មិនអាចនឹងជួយផ្ដល់សព្វាវុធដល់តៃវ៉ាន់ នៅពេលដែលចិនពង្រីកការគំរាមកំហែងផ្នែកយោធាឡើយ។ ប្រធានគណៈកម្មាធិការការពារជាតិរបស់សភាអាល្លឺម៉ង់រូបនេះសង្កត់ធ្ងន់ថា ក៏មិនមានការស្នើសុំណាមួយឱ្យបញ្ជូនជំនួយអាវុធទៅកាន់តៃវ៉ាន់នោះដែរ។
អនុប្រធានបក្ស FDP លោក Johannes Vogel ក៏លើកឡើងក្នុងសន្និសីទខាងលើពីភាពចាំបាច់ក្នុងការបញ្ចៀសវិបត្តិនៅច្រកសមុទ្រតៃវ៉ាន់ផងដែរ។ លោកស្រី Strack-Zimmermann និងលោក Vogel បានជួបប្រធានាធិបតីតៃវ៉ាន់ នៅថ្ងៃទី១០ ខែមករា។ ឯចិនវិញបានថ្កោលទោសដំណើរទស្សកិច្ចនេះ។
គួរបញ្ជាក់ថា អាវុធយោធាតៃវ៉ាន់ភាគច្រើនត្រូវបានបំពាក់ដោយសព្វាវុធផលិតក្នុងស្រុក ឬដោយអាម៉េរិក។ ចំណែកអាល្លឺម៉ង់មានទំនាក់ទំនងការទូត និងពាណិជ្ជកម្មជិតស្និទ្ធជាមួយចិនហើយដូច ប្រទេសភាគច្រើនដែរ មិនមានទំនាក់ទំនងការទូតផ្លូវការជាមួយតៃវ៉ាន់ទេ៕
© រក្សាសិទ្ធិដោយ thmeythmey.com