អន្តរជាតិ
អូស្ត្រាលី និងប៉ាពូអាស៊ីនូវែលហ្គីណេគ្រោងចុះហត្ថលេខាលើសន្ធិសញ្ញាការពារជាតិត្រឹមខែមិថុនា នាយករដ្ឋមន្រ្តីប៉ាពូអាស៊ីនូវែលហ្គីណេ James Marape ស្វាគមន៍សមភាគីអូស្ត្រាលី អាន់ថូនី អាល់បានីស។ រូបថត AFP
× អូស្ត្រាលី និងប៉ាពូអាស៊ីនូវែលហ្គីណេព្រមព្រៀងគ្នាបញ្ចប់កិច្ចពិភាក្សាលើកិច្ចព្រមព្រៀងសន្ធិសុខទ្វេភាគីក្នុងខែមេសា ហើយរំពឹងចុះហត្ថលេខាលើសន្ធិសញ្ញានេះនៅត្រឹមខែមិថុនា។
នាយករដ្ឋមន្ត្រីអូស្ត្រាលី អាន់តូនី អាល់បានីស និងសមភាគីប៉ាពូអាស៊ីនូវែលហ្គីណេលោក James Marape បានប្ដេជ្ញាសម្រេចឱ្យបានសន្ធិសញ្ញាសន្តិសុខទ្វេភាគីត្រឹមថ្ងៃទី៣០ ខែមេសាខាងមុខ។ ភាគីទាំងពីរ ក៏ជជែកលើការហ្វឹកហ្វឺនកងទ័ព និងប្រតិបត្តិការរួមគ្នា រួមទាំងបញ្ហាប្រែប្រួលអាកាសធាតុ និងសន្តិសុខតាមអ៊ីនធឺណិតជាដើម។
ក្នុងសន្និសីទក្រោយការថ្លែងសុន្ទរកថានៅសភាប៉ាពូអាស៊ីនូវែលហ្គីណេ លោក អាល់បានីស លើកឡើងថា ផលប្រយោជន៍សេដ្ឋកិច្ច និងសន្តិសុខរបស់ប្រទេសជិតខាងតំបន់ប៉ាស៊ីហ្វិកមិនអាចបំបែកបានឡើយ។
«កិច្ចសហប្រតិបត្តិការសេដ្ឋកិច្ច និងកិច្ចសហប្រតិបត្តិការសន្តិសុខរបស់យើងស្ថិតនៅក្នុងផលប្រយោជន៍របស់យើងទាំងពីរ»។ លោក អាល់បានីស លើកឡើបែបនេះក្នុងសន្និសីទកាសែតមួយ មុនបង្ហាញក្ដីសង្ឃឹមថា កិច្ចព្រមព្រៀងមួយនឹងអាចធ្វើឡើងក្នុងខែមិថុនា។ មេដឹកនាំអូស្ត្រាលីរូបនេះបន្តថា ផលប្រយោជន៍ប្រទេសទាំងពីរមិនអាចបំបែកគ្នាបាននោះឡើយ ហើយសន្តិសុខរបស់ប្រទេសទាំងពីរត្រូវដើទន្ទឹមគ្នាដើម្បីការពារគ្នាទៅវិញទៅមក។
ចំណែកមេដឹកនាំប៉ាពូអាស៊ីនូវែលហ្គីណេ បញ្ជាក់ថា កិច្ចព្រមព្រៀងដែលបានស្នើខាងលើ នឹងលើកកម្ពស់ទំនាក់ទំនងជាមួយអូស្ត្រាលីដែលលោកបានចាត់ទុកជាមិត្តជានិរន្តរ៍។ លោកអះអាងថា ទំនាក់ទំនងប្រទេសទាំងពីរនឹងមិនបង្កគ្រោះថ្នាក់ដល់ទំនាក់ទំនងទ្វេភាគីរបស់ប៉ាពួញូហ្គីណេជាមួយប្រទេសផ្សេងទៀតឡើយ។
ជុំវិញកិច្ចព្រមព្រៀងការពារជាតិនេះ រដ្ឋមន្ត្រីក្រសួងការពារជាតិអូស្ត្រាលី លោក Richard Marles បាននិយាយកាលពីខែតុលាថា អូស្ត្រាលីចង់មានកិច្ចព្រមព្រៀងមួយដែលនឹងអនុញ្ញាតឱ្យទាហានជើងទឹក កម្លាំងទ័ពអាកាស និងកងទ័ពមកពីប្រទេសទាំងពីរធ្វើការជាមួយគ្នាញឹកញាប់ជាងមុន។
គួរបញ្ជាក់ថា អូស្ត្រាលីនៅតែជាប្រទេសផ្តល់ជំនួយដ៏ធំបំផុតដល់ប៉ាពូអាស៊ីនូវែលហ្គីណេដែលខ្លួនធ្លាប់ដាក់អាណានិគម។ ប្រឈមមុខនឹងការរីកលូតលាស់នៃជំនួយ និងឥទ្ធិពលរបស់ចិន អូស្ត្រាលីបានព្យាយាមពង្រឹងទំនាក់ទំនងជាមួយប្រទេសជិតខាងភាគខាងជើងរបស់ខ្លួន ហើយបានជួបមេដឹកនាំតំបន់ជាច្រើនដងចាប់តាំងពីលោក អាល់បានី បានឈ្នះការបោះឆ្នោតកាលពីខែឧសភាឆ្នាំមុន៕
Tag:
អូស្ត្រាលី
ប៉ាពូអាស៊ីនូវែលហ្គីណេ
© រក្សាសិទ្ធិដោយ thmeythmey.com