កាលពីថ្ងៃទី៣១ធ្នូ ឆ្នាំ២០២២ ដល់ ថ្ងៃទី២មករា ឆ្នាំ២០២៣ គណៈកម្មាធិការជាតិវាយតម្លៃទីក្រុងស្អាត​​ និង ក្រសួងទេសចរណ៍ បានបើកឱ្យសាធារណជនចូលរួមបោះឆ្នោតគាំទ្រទីក្រុងដែលខ្លួនពេញចិត្តជាងគេបំផុត នៃកម្មវិធីប្រកួតប្រជែង«ទីក្រុងស្អាតដែលមានពិធីបុណ្យចូលឆ្នាំសកលល្អជាងគេប្រចាំឆ្នាំ២០២២» តាមរយៈគេហទំព័រផ្លូវការ http:bestcountdowncity.cambodiaclancity.gov.kh/។ 

 

ជាលទ្ធផល គឺខេត្តបាត់ដំបង បានជាប់ជ័យលាភីលេខ១ ដែលទទួលបានសំឡេងគាំទ្រច្រើនជាងគេ។ សម្រាប់ជ័យលាភីលេខ២ បានទៅលើខេត្តព្រះសីហនុ ខណៈខេត្តសៀមរាប ជាប់លេខ៣​។ ក្រសួងទេសចរណ៍ បានបញ្ជាក់ថា ពិធីប្រគល់ពានរង្វាន់ដល់ខេត្តជ័យលាភីទាំងបីនេះ នឹងប្រព្រឹត្តិឡើងក្នុង«ពិធីអបអរសាទរទិវាជាតិទីក្រុងស្អាត» នៅថ្ងៃទី២៣កុម្ភៈ ឆ្នាំ២០២៣។ 

 

របាយការណ៍របស់ក្រសួងទេសចរណ៍ បានបង្ហាញថា ពិធីបុណ្យឆ្លងឆ្នាំសកលឆ្នាំ២០២២ កម្ពុជាមានភ្ញៀវទេសចរជាតិ-អន្តរជាតិ ជាង២លាននាក់ បានដើរកម្សាន្តនៅតាមតំបន់គោលដៅនានានៅទូទាំងប្រទេស។ ក្នុងនោះ ខេត្តបាត់ដំបងទទួលបានភ្ញៀវទេសចរចំនួន ១៥៨ ១១០នាក់, ខេត្តព្រះសីហនុ គឺទទួលអ្នកទេសចរ៣៣៨ ៥៥២នាក់ និងខេត្តសៀមរាប ទទួលបានអ្នកទេសចរ ចំនួន៣៣៧ ៧៦៩នាក់៕