ជាតិ
យុវជនសកម្ម សេវាល្អ
ឧត្ដរមានជ័យ៖ មេប៉ុស្តិ៍នគរបាលគោកខ្ពស់ តាំងចិត្តលុបបំបាត់ល្បែងស៊ីសងក្នុងឃុំខ្លួន លោក វ៉ាង ម៉ាប់ នាយប៉ុស្តិ៍នគរបាលគោកខ្ពស់ និងក្រុមយុវជនរបស់ អង្កការ YCC។
×
ដោយ៖ វ៉ាន់ រ៉ាឌី (យុវជនឃុំគោកខ្ពស់)
ស្រុកបន្ទាយអំពិល, ឧត្ដរមានជ័យ៖ សកម្មភាពនៃការលេងល្បែងស៊ីសង នៅឃុំគោកខ្ពស់ ស្រុកបន្ទាយអំពិល ខេត្តឧត្ដរមានជ័យ ត្រូវបានកាត់បន្ថយគួរឱ្យកត់សម្គាល់ នៅក្នុងរយៈប៉ុន្មានឆ្នាំចុងក្រោយនេះ បន្ទាប់ពីមានការផ្សព្វផ្សាយពីចាត់វិធានការតឹងរឹងលើអ្នកប្រព្រឹត្ត និងការបង្ក្រាបជាបន្តបន្ទាប់ពីអាជ្ញាធរ។ ដោយឡែកមានតែការចោកឆ្នោតមួយប៉ុណ្ណោះ ដែលពិបាកបង្រ្កាបជាងគេ ទោះបីអាជ្ញាធរ ព្រមានជាច្រើនលើកច្រើនសាក៏ដោយ។ ពាក់ព័ន្ធបញ្ហានេះ លោក វ៉ាង ម៉ាប់ នាយប៉ុស្តិ៍នគរបាលគោកខ្ពស់ បានតាំងចិត្តយ៉ាងមុតមាំ ក្នុងការលុបបំបាត់ សកម្មភាពល្បែងស៊ីសងគ្រប់ប្រភេទនៅក្នុងសហគមន៍របស់ខ្លួន។
បើតាម លោក វ៉ាង ម៉ាប់ ប៉ុន្មានឆ្នាំចុងក្រោយនេះ ការលេងល្បែងស៊ីសង នៅឃុំគោកខ្ពស់ ត្រូវបានថយចុះយ៉ាងគំហុក ដោយសារសមត្ថកិច្ចចុះអប់រំ និងផ្សព្វផ្សាយញឹកញាប់។ សព្វថ្ងៃ ការលេងល្បែងស៊ីសង មានតែលក្ខណៈទ្រង់ទ្រាយតូចប៉ុណ្ណោះ ដូចជាអាប៉ោង ខ្លាឃ្លោក បៀរ និងឆ្នោតជាដើម។ ប៉ុន្តែល្បែងទាំងនោះ លេងច្រើន តែថ្ងៃសម្រាក និងបុណ្យទានប៉ុណ្ណោះ។
ដោយឡែក ល្បែងឆ្នោតនៅតែជាបញ្ហារសើប សម្រាប់ភូមិសាស្រ្តឃុំគោកខ្ពស់នៅឡើយ ដោយសារល្បែងនេះ បានលួចលាក់លេងស្ងាត់ៗ។ ពាក់ព័ន្ធបញ្ហាឆ្នោតនេះ ប៉ុស្តិ៍នគរបាលគោកខ្ពស់ ធ្លាប់បានចេញលិខិតព្រមានជាច្រើនដងរួចមកហើយ ប៉ុន្តែអ្នកល្មើសហាក់មិនរាងចាល។ លោក វ៉ាង ម៉ាប់ ប្រាប់ដូច្នេះថា៖«កន្លែងនេះ អត់មានបើកល្បែងស៊ីសងបានទេ។ ប៉ុន្តែយើងមានបញ្ហាប្រឈមមួយ គឺករណីឆ្នោត។ បញ្ហានេះខ្ញុំបានធ្វើកិច្ចសន្យាបញ្ឈប់ហើយ តែជួនកាលគាត់លួចលេង។ ល្បែងផ្សេងពីហ្នឹង គាត់លេងតែថ្ងៃបុណ្យទានទេ»។
ការលេងល្បែងស៊ីសង អាចនាំឱ្យខាតពេលវេលា ប៉ះពាល់ដល់សេដ្ឋកិច្ចសង្គម-គ្រួសារ ជាពិសេស បង្កជាអំពើហិង្សា ចោរកម្មជាដើម។ ដើម្បីបញ្ចៀសកុំឱ្យមានបញ្ហាអសន្តិសុខណាមួយកើតឡើង ដែលបណ្តាលមកពីសកម្មភាពលេងល្បែងស៊ីសងនេះ លោក វ៉ាង ម៉ាប់ នាយប៉ុស្តិ៍នគរបាលគោកខ្ពស់ បានតាំងចិត្តយ៉ាងមោះមុត ក្នុងការលុបបំបាត់ល្បែងស៊ីសង ឱ្យអស់ក្នុងរយៈពេលដ៏ខ្លីខាងមុខ ពីក្នុងឃុំគោកខ្ពស់ តាមរយៈការផ្សព្វផ្សាយ និងអប់រំ តាមសហគមន៍៕
(អត្ថបទនេះគឺជាស្នាដៃរបស់ក្រុមយុវជន និងត្រូវបានរៀបរៀងឡើងក្រោមជំនួយហិរញ្ញវត្ថុរបស់សហភាពអឺរ៉ុបនិងទីភ្នាក់ងារសហប្រតិបត្តិការអភិវឌ្ឍអន្តរជាតិស៊ុយអ៊ែតតាមរយៈអង្គការតម្លាភាពកម្ពុជា និងអង្គការអាក់សិនអេតកម្ពុជា។រាល់ខ្លឹមសារនៅក្នុងអត្ថបទ និងវីដេអូនេះ គឺជាការទទួលខុសត្រូវរបស់ស្មេរ ឬផលិតករហើយមិនឆ្លុះបញ្ចាំងអំពីទស្សនៈរបស់សហភាពអឺរ៉ុប និងទីភ្នាក់ងារសហប្រតិបត្តិការអភិវឌ្ឍអន្តរជាតិស៊ុយអ៊ែតនោះទេ)
Tag:
ល្បែងស៊ីសង
សន្តិសុខ
ឧត្ដរមានជ័យ
បន្ទាយអំពិល
© រក្សាសិទ្ធិដោយ thmeythmey.com