បើតាម លោក វ៉ាង ម៉ាប់ ប៉ុន្មានឆ្នាំចុងក្រោយនេះ ការលេងល្បែងស៊ីសង នៅឃុំគោកខ្ពស់ ត្រូវបានថយចុះយ៉ាងគំហុក ដោយសារសមត្ថកិច្ចចុះអប់រំ និងផ្សព្វផ្សាយញឹកញាប់។ សព្វថ្ងៃ ការលេងល្បែងស៊ីសង មានតែលក្ខណៈទ្រង់ទ្រាយតូចប៉ុណ្ណោះ ដូចជាអាប៉ោង ខ្លាឃ្លោក បៀរ និងឆ្នោតជាដើម។ ប៉ុន្តែល្បែងទាំងនោះ លេងច្រើន តែថ្ងៃសម្រាក និងបុណ្យទានប៉ុណ្ណោះ។ 

 

ដោយឡែក ល្បែងឆ្នោតនៅតែជាបញ្ហារសើប សម្រាប់ភូមិសាស្រ្តឃុំគោកខ្ពស់នៅឡើយ ដោយសារ​ល្បែងនេះ បានលួចលាក់លេងស្ងាត់ៗ។ ពាក់ព័ន្ធបញ្ហាឆ្នោតនេះ ប៉ុស្តិ៍នគរបាលគោកខ្ពស់ ធ្លាប់បានចេញលិខិតព្រមានជាច្រើនដងរួចមកហើយ ប៉ុន្តែអ្នកល្មើសហាក់មិនរាងចាល។ លោក វ៉ាង ម៉ាប់ ប្រាប់ដូច្នេះថា៖«កន្លែងនេះ អត់មានបើកល្បែងស៊ីសងបានទេ។ ប៉ុន្តែយើងមានបញ្ហាប្រឈមមួយ គឺករណីឆ្នោត។ បញ្ហានេះខ្ញុំបានធ្វើកិច្ចសន្យាបញ្ឈប់ហើយ តែជួនកាលគាត់លួចលេង។ ល្បែងផ្សេងពីហ្នឹង គាត់លេងតែថ្ងៃបុណ្យទានទេ»។

 

ការលេងល្បែងស៊ីសង អាចនាំឱ្យខាតពេលវេលា ប៉ះពាល់ដល់សេដ្ឋកិច្ចសង្គម-គ្រួសារ ជាពិសេស បង្កជាអំពើហិង្សា ចោរកម្មជាដើម។ ដើម្បីបញ្ចៀសកុំឱ្យមានបញ្ហាអសន្តិសុខណាមួយកើតឡើង ដែលបណ្តាលមកពីសកម្មភាពលេងល្បែងស៊ីសងនេះ លោក​ វ៉ាង ម៉ាប់ នាយប៉ុស្តិ៍នគរបាលគោកខ្ពស់ បានតាំងចិត្តយ៉ាងមោះមុត ក្នុងការលុបបំបាត់ល្បែងស៊ីសង ឱ្យអស់ក្នុងរយៈពេលដ៏ខ្លីខាងមុខ ពីក្នុងឃុំគោកខ្ពស់ តាមរយៈការផ្សព្វផ្សាយ និងអប់រំ តាមសហគមន៍៕ 

 

​អានអត្ថបទពាក់ព័ន្ធផ្សេងទៀត៖ យុវជនសកម្ម សេវាល្អ