ប្រធានសហព័ន្ធកីឡាកាយវប្បកម្ម លោក តឹក ប៊ុនវី បាននិយាយក្នុងពិធីសន្និសីទសារព័ត៌មានទាំងទឹកមុខសោកស្តាយជាខ្លាំងក្រោយពិនិត្យឃើញថា កីឡាករដែលឈ្នះមេដាយក្នុងព្រឹត្តិការណ៍កីឡាជាតិលើកទី៣ កន្លងមក មានជាប់ពាក់ព័ន្ធនឹងការប្រើប្រាស់សារធាតុហាមឃាត់ Doping ( ស្តេរ៉យ បញ្ចុះជាតិទឹក) ដែលជាហេតុបណ្តាលឱ្យមានការត្រួតពិនិត្យពីស្ថាប័នជាតិ និងអន្តរជាតិ រហូតសម្រេចដកកីឡាកាយវប្បកម្ម ចេញពីការប្រកួតស៊ីហ្គេម២០២៣ ខាងមុខនេះ។

 

 

លោក តឹក ប៊ុនវី និយាយថា៖«ខ្ញុំសូមទោសជាសាធារណៈ ចំពោះបងប្អូនកីឡាករដែលបានប្រឹងប្រែងហ្វឹកហាត់ដើម្បីចូលរួមប្រកួតស៊ីហ្គេម ដែលសង្ឃឹមថាយើងនឹងបានចូលរួមស៊ីហ្គេម ប៉ុន្តែឥឡូវឮ CAMSOC សម្រេ​ចទម្លាក់ប្រភេទកីឡាររបស់យើងចេញពីស៊ីហ្គេមហើយ»។ ប្រធានសហព័ន្ធបន្ថែមថា ខ្លួនពិតជាមានការសោកស្តាយមែនទែន ហើយឈឺចាប់។

 

ជាមួយនឹងការសោកស្តាយជាពន់ពេក លោក តឹក ប៊ុនវី ក៏បានសូមអំពាវនាវ សម្តេច ហ៊ុន សែន ជួយស្នើរសុំឱ្យគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ មេត្តាត្រួតពិនិត្យ ដកអ្នកដែលប្រព្រឹត្តខុសចេញ ហើយអ្នកដែលមិនខុសសូមអនុញ្ញាត​ឱ្យចូលប្រកួតវិញបាន។

 

«ខ្ញុំសូមសំណូមពរដល់សម្តេច ហ៊ុន សែន ជួយអន្តរាគមន៍ផង ព្រោះខ្ញុំបេះដូងជាអ្នកកីឡាខ្ញុំមានការសោកស្តាយជាខ្លាំង ដែលកីឡាកររបស់យើងបានធ្វើខុសនូវច្បាប់ដែលគេបានហាមឃាត់ទូទាំងពិភពលោក ខ្ញុំសោកស្តាយកីឡាករផ្សេងដែលគាត់អត់បានប្រព្រឹត្ត ហើយគាត់ត្រូវបានគណៈកម្មាធិការជាតិ CAMSOC សម្រេចដកចេញកីឡារកាយវប្បកម្មយើងពីស៊ីហ្គេម២០២៣»។ លោក តឹក ប៊ុនវី សូមណូបពរទៅកាន់សម្តេចនាយករដ្ឋមន្ត្រីដូច្នេះ៕