សារព័ត៌មានថ្មីៗ មិនអាចសុំព័ត៌មានបន្ថែមពីមេធាវីទាំង២រូបរបស់កញ្ញា ឈឹម ស៊ីថរ ឡើយ។ អ្នកស្រីមេធាវី សាម សុគន្ធា ប្រាប់ថា អ្នកស្រី កំពុងជាប់រវល់ ហើយរុញឲ្យទៅសួរលោកមេធាវី សំ ចំរើន។ តែលោកមេធាវី សំ ចំរើន មិនលើកទូរស័ព្ទ។ កញ្ញា ឈឹម ស៊ីថរ ក៏មានវត្តមានក្នុងសវនាការនេះដែរ ហើយកញ្ញា ត្រូវបានដឹកទៅឃុំនៅពន្ធនាគារព្រៃសវិញ ក្រោយចប់សវនាការ។ 
  

ដោយសារការដឹនាំ និងការចូលរួមធ្វើកូដកម្មជាមួយអតីតក្រុមបុគ្គលិកក្រុមហ៊ុនណាហ្កាវើលដ៍ កញ្ញា ឈឹម ស៊ីថរ ត្រូវបានចោទប្រកាន់ពីបទញុះញង់បង្កឲ្យមានភាពវឹកវរដល់សង្គម និងត្រូវចាប់ខ្លួនលើកដំបូងកាលពីដើមឆ្នាំ២០២២។ ជាប់ឃុំបានប្រមាណ២ខែ កញ្ញា ត្រូវដោះលែងនៅក្រៅឃុំបណ្តោះអាសន្ន តែនៅជាប់បទចោទដដែល។ 
 

ដល់ចុងឆ្នាំ២០២២ កញ្ញា ត្រូវចាប់ខ្លួនលើកទី២ បន្ទាប់ពីវិលមកពីប្រទេសអូស្រ្តាលី។ អយ្យការអមតុលាការភ្នំពេញ បកស្រាយថា កញ្ញា ត្រូវតុលាការ ហាមមិនឲ្យចេញក្រៅប្រទេស តែបែរជាចេញទៅអូស្ត្រាលី ដោយមិនបានសុំការអនុញ្ញាតពីតុលាការ ទើបត្រូវចាប់ខ្លួនឡើងវិញ។ 
 

ដោយឡែក អតីតក្រុមបុគ្គលិកក្រុមហ៊ុនណាហ្កាវើលដ៍ ដែលនាំគ្នាតវ៉ាតាំងពីចុងឆ្នាំ២០២១មកនោះ នៅតែបន្តតវ៉ាដដែល។ គោលបំណងរបស់ពួកគេ គឺសុំឲ្យក្រុមហ៊ុនណាហ្កាវើលដ៍ ទទួលអ្នកដែលត្រូវបញ្ឈប់ពីការងារ ចូលធ្វើការវិញ។ ក្រៅពីការតវ៉ានឹងក្រុមហ៊ុនណាហ្កាវើលដ៍ ពេលខ្លះ ពួកគេ ក៏ងាកមកប្រមូលផ្តុំគ្នាដើម្បីទាមទារឲ្យដោះលែងកញ្ញា ឈឹម ស៊ីថរ ដែលជាមេសហជីពរបស់ពួកគេ៕