​ទីផ្សារ​មូលបត្រ​កម្ពុជា សម្រេចចុះបញ្ជីជាផ្លូវការនូវការបោះលក់សញ្ញាបណ្ណបៃតងរបស់ក្រុមហ៊ុនហ្គោលដេន ទ្រី នាថ្ងៃទី១៩មករា។ ការបោះលក់មូលបត្របំណុលបៃតងរបស់ក្រុមហ៊ុននេះ គឺមានទំហំទឹកប្រាក់ ប្រមាណ១,៥លានដុល្លារជាមួយអត្រាការប្រាក់៧ភាគរយក្នុងមួយឆ្នាំ និងមានឥណប្រតិទានក្នុងរយៈពេល៥ឆ្នាំ។

 

បើតាមលោក ហុង សុហួរ អគ្គនាយកផ្សារមូលបត្រកម្ពុជា ការសម្រេចនូវភាពជោគជ័យនៃការចុះបញ្ជីសញ្ញាបណ្ណបៃតងរបស់ក្រុមហ៊ុន ហ្គោលដេន ទ្រី នេះ គឺបានបង្ហាញឱ្យឃើញថាវិស័យមូលបត្រកម្ពុជាកំពុងតែចូលរួមយ៉ាងសកម្មក្នុងការគាំទ្រ និង លើកកម្ពស់បរិស្ថានជាសកល ដើម្បីការអភិវឌ្ឍសង្គម និងពិភពលោក​ប្រកបដោយចីរភាព។ 

 

លោក សុហួរ បានបញ្ជាក់ថា៖ «នេះជាចំណុចស្រូបទាញមួយក្នុងបរិបទនាពេលបច្ចុប្បន្នដែលវិនិយោគិនបានផ្តោតការចាប់អារម្មណ៍កាន់តែខ្លាំងលើជ្រុងសេដ្ឋកិច្ច លើជ្រុងបរិស្ថាន លើជ្រុងសង្គម។ អ៊ីចឹងហើយ! បានជាយើងចូលរួមយុទ្ធនាការទប់ស្កាត់ការគំរាមគំហែងជាសកល ពីការប្រែប្រួលអាកាសធាតុជាមួយរដ្ឋាភិបាលដែល​ប្តេជ្ញា​ចិត្តលើ​ការកាត់បន្ថយ​ឧស្ម័ន​កាបូន​ឆ្នាំ២០១៣-២០៣០»។ 

 

សញ្ញាបណ្ណបៃតង ជាប្រភេទឧបករណ៍ជួញដូរហិរញ្ញវត្ថុថ្មី ដែលមានភាពទាក់ទាញ និងផ្តល់អត្ថប្រយោជន៍ច្រើនដល់សង្គម និងសេដ្ឋកិច្ចជាតិ តាមរយៈការផ្តល់ហិរញ្ញប្បទានដល់គម្រោងដែលនឹងចូលរួមចំណែកជាវិជ្ជមាន ដល់បរិស្ថាន និងអាកាសធាតុ។

លោក ស៊ូ សុជាតិ អគ្គនាយកនិយ័តមូលបត្រកម្ពុជា បានលើកឡើងថា​ ការបោះផ្សាយសញ្ញាបណ្ណបៃតងដោយក្រុមហ៊ុន​ហ្គោលដេន ទ្រី  គឺត្រឹមតែអនុវត្តស្របតាមគោលការណ៍ណែនាំសញ្ញាបណ្ណបៃតងរបស់កម្ពុជាប៉ុណ្ណោះទេ តែវាក៏ស្របតាមស្តង់ដារបទដ្ឋានរបស់អាស៊ាន ផងដែរ។  លោក​បន្ថែមថា​  ចំំពោះការរៀបចំនិតីវិធីក្នុងការបោះផ្សាយសញ្ញាបណ្ណបៃតងនេះ គឺកម្ពុជាទទួលបានការគាំទ្រផ្នែកជំនួយបច្ចេកទេស ពីធនាគារអភិវឌ្ឈន៍អាស៊ី (ADB)។
 

យោងតាមរបាយការណ៍ពីផ្សារមូលបត្រកម្ពុជា បច្ចុប្បន្នមានក្រុមហ៊ុនចំនួន១៨ បានចុះបញ្ជីនៅផ្សារមូលបត្រកម្ពុជា។ ក្នុងនោះ មាន៩ជាក្រុមហ៊ុនបោះផ្សាយមូលបត្រកម្មសិទ្ធ  និង៩ទៀត គឺក្រុមហ៊ុនបោះលក់មូលបត្របំណុល ដែលក្រុមហ៊ុនទាំងនោះប្រមូលទុនពីផ្សារមូលបត្រកម្ពុជាបានប្រមាណ៣១៧លានដុល្លារ។ ជាមួយនឹងកំណើននៃចំនួនក្រុមហ៊ុនដែលបានចុះបញ្ជីនេះ បរិមាណ និងទំហំជួញដូរភាគហ៊ុនប្រចាំថ្ងៃជាមធ្យម ក៏មានការកើនឡើងជាលំដាប់។ លោក ហុង សុហួរ បានបញ្ជាក់ ថា ទំហំជួញដូរប្រចាំថ្ងៃជាមធ្យមបានកើនដល់ប្រមាណ៥០ម៉ឺនដុល្លារ ខណៈចំនួនគណនីជួញដូរបានកើនដល់ ៣,៦ម៉ឺនគណនី ក្នុងឆ្នាំ២០២២៕