ដើម្បីរកបាននូវវិធីសាស្ត្រដែលល្អក្នុងការដោះស្រាយ លើបញ្ហាជាប់គាំងសំណង់នៅខេត្តព្រះសីហនុ គណៈកម្មការដោះស្រាយបញ្ហាគម្រោងវិនិយោគជាប់គាំងនៅក្នុងខេត្តព្រះសីហនុ នឹងចាប់ផ្តើមអត្តសញ្ញាណកម្ម​លើសំណង់អគារមួយៗឬ ក៏ប្រវត្តិនៃសំណង់អគារទាំងនោះ ដើម្បីរៀបចំផែនការសកម្មភាពក្នុងការសុំ គោលការណ៍អនុវត្តពីរាជរដ្ឋាភិបាល។ បើតាមលោក​ឡុង ឌីម៉ង់  ការធ្វើអត្តសញ្ញាណកម្មនៃសំណង់អគារជាប់គាំងទាំងនោះ នឹងកំណត់លើចំនួនអគារដែលមានទំហំវិនិយោគចាប់ពី១លានដុល្លារឡើងទៅ, កំណត់លើអគារដែលជាប់គាំងការសាងសង់មុនឬក្រោយឆ្នាំ២០១៧ រួមការកំណត់អត្តសញ្ញាណកម្មផ្សេងៗលើសំណង់អគារទាំងនោះ។ 
 

 

គួរជម្រាបថា ការដ្ឋានសំណង់ប្រមាណ១១០០កន្លែងនៅខេត្តព្រះសីហនុដែលកំពុងជាប់គាំងការសាងសង់មកទល់បច្ចុប្បន្ន មានភាគច្រើនម្ចាស់ទីតាំងគឺជាជនជាតិខ្មែរ។ រីឯគម្រោងសំណង់អគារនានា គឺជាការវិនិយោគផ្ទាល់របស់ជនជាតិចិន។ បញ្ហានេះបានកើតឡើងបន្ទាប់ពីការចាកចេញរបស់វិនិយោគិនចិន ព្រោះតែការបិទហ្គេមអនឡាញ និងវិបត្តិកូវីដ-១៩ នារយៈពេល៣ឆ្នាំមកនេះ៕