កីឡាករកង់ភ្នំជម្រើសជាតិកម្ពុជា ឃឹម ម៉េងឡុង ទទួលបានចំណាត់ថ្នាក់លេខ៣ លើវិញ្ញាសា​ XCO Men Elite ខណៈចំណាត់លេខ៤ បានទៅកីឡាករ ឆាន ឆៃហ្វុង។ វិញ្ញាសា​ XCO Men Under23 ចំណាត់ថ្នាក់លេខ៣ បានទៅកីឡាករ ឃឹម ម៉េងឡុង និងលេខ៤ បានទៅកីឡាករ ឆាន ឆៃហ្វុង។

 

ចំណែកកីឡាការិនីកម្ពុជា ខេន ម៉ាឡៃ ទទួលបានចំណាត់ថ្នាក់លេខ៥ លើវិញ្ញាសា XCO Women Elite និងវិញ្ញាសា XCO Women Under23 ទទួលបានចំណាត់ថ្នាក់លេខ៣។ រីឯវិញ្ញាសា Eliminate កីឡាករ ឃឹម ម៉េងឡុង ទទួលបានចំណាត់ថ្នាក់លេខ៣ កីឡាករ ឆាន ឆៃហ្វុង ឈរលេខ៧ និងកីឡាការិនី ឈរលេខ៦។
  

ជាមួយគ្នានោះដែរលោក អ៊ុច សុខវិបុល គ្រូបង្វឹកជម្រើសជាតិកម្ពុជា វាយតម្លៃចំពោះសមត្ថភាពអត្តពលិកកីឡាកង់ភ្នំកម្ពុជាថា មានភាពលូតលាស់លឿនគួរឱ្យកត់សម្គាល់ ជាពិសេសកាន់តែធ្វើបានល្អក្នុងព្រឹត្តិការណ៍លំដាប់កំពូលក្នុងប្រទេសថៃ ក្រោមផែនការ និងកិច្ចការជាក់លាក់ច្បាស់របស់សហព័ន្ធ។

 

លោក អ៊ុច សុខវិបុល និយាយថា៖«កីឡាករ-កីឡាការិនីរបស់យើងសុទ្ធសឹងតែមានវ័យក្មេងៗ  បន្ទាប់ពីបានបោះជំរំហ្វឹកហាត់រយ:ពេលជាងមួយឆ្នាំ  គឺមានការរីកលូត Performance លឿនប្រហាក់ប្រហែលនឹង កីឡាករ-កីឡាការិនី Elite បណ្តារប្រទេសក្នុងតំបន់អាស៊ីអាគ្នេយ៍  ដែលមានការហ្វឹកហាត់ចន្លោះពី ៣-៥ឆ្នាំ»។ 

 

ថ្វីដ្បិតលទ្ធផលល្អក៏ពិតមែនប៉ុន្តែលោក សុខវិបុល នៅតែបន្តពង្រឹងសមត្ថភាពអត្តពលិកជម្រើសជាតិ ដើម្បីបន្តកិច្ចការបន្ទាប់ដោយមានទំនុកចិត្តខ្ពស់ឆ្ពោះទៅកាន់ក្តីស្រមៃ  និងគោលដៅមេដាយស៊ីហ្គេមនៅកម្ពុជា និងតទៅមុខទៀត។

 

«ការប្រកួតនៅថៃលើកនេះ​ យើងមើលឃើញពីគុណផលអត្តពលិកល្អ ទាំងបច្ចេកទេស តាក់តិកផ្លូវ ដែលនេះជាក្តីសង្ឃឹមឈានទៅដណ្តើមមេដាយស៊ីហ្គេមនៅកម្ពុជា។ ក្នុងគោលបំណងមិនមែនត្រឹមតែស៊ីហ្គេម ២០២៣នោះទេ  គឺគិតដល់លទ្ធផលស៊ីហ្គេមបន្ទាប់ទៀតនៅប្រទេសថៃ»។ លោក អ៊ុច សុខវិបុល បញ្ជាក់ដូច្នេះ។
 

គួបញ្ជាក់ថា កីឡាករ-កីឡាការិនីកម្ពុជា ៣រូបប្រកួតរយៈពេល២ថ្ងៃ(២៨-២៩ ខែមករា) ទទួលបានពានរង្វាន់ចំនួន៧ ពីការប្រកួតកីឡាទោចក្រយានវិញ្ញាសាកង់ភ្នំ ពានរង្វាន់ Royal Cup Thailand National Championship នៅប្រទេសថៃ៕