នាជំនួបវគ្គផ្តាច់ព្រ័ត្រ Australian Open ក្នុងកីឡដ្ឋាន ​Melbourne Park នោះ Djokovic បានយកឈ្នះលើកីឡាករវ័យ​ ២៤ឆ្នាំសញ្ជាតិគ្រិកក្នុងលទ្ធផលដ៏តានតឹងចំនួន ៣សិត​ ៦-៣ ៧-៦(៤) និង ៧-៦(៥) ។ 
 

​ជ័យជម្នះក្នុងប្រទេសអូស្ត្រាលីលើកនេះ បានក្លាយជាកំណត់ត្រាលើកទី១០ ហើយសម្រាប់កីឡាករវ័យ ៣៥ឆ្នាំ ដែលឈ្នះពាន Grand Slam នេះ ហើយតាមស្មើកំណត់ត្រារបស់ ​Rafael Nadal ដែលឈ្នះ Grand Slam ចំនួន ២២លើក។ ក្រោយឈ្នះពាន Grand Slam លើកទី២២នេះ Djokovic បានក្លាយជាកីឡាករវាយកូនបាល់លំដាប់លេខ ១ពិភពលោកឡើងវិញក្នុងវ័យ ៣៥ឆ្នាំ។
 

«មានតែក្រុមតែប៉ុណ្ណោះ និងគ្រួសារដែលដឹងថា យើងបានឆ្លងកាត់អ្វីខ្លះក្នុងរយៈពេល ៤ ឬ ៥សប្តាហ៍មកនេះ។ ខ្ញុំអាចនិយាយបានថានេះពិតជាការឈ្នះដ៏ធំបំផុតសម្រាប់ជីវិតរបស់ខ្ញុំ ដោយគិតទៅលើកាលៈទេសៈទាំងអស់នេះ។»។ Djokovic បាននិយាយប្រាប់អ្នកកាសែតបែបនេះក្រោយចប់ការប្រកួត។
 

Australian Open ឆ្នាំ ២០២៣ បានក្លាយជារឿងដ៏មិនធម្មតាមួយ និងជាការចង់ចាំមួយ​ សម្រាប់កីឡាករសញ្ជាតិស៊ែប៊ី ដោយរូបគេបានឆ្លងកាត់ការប្រកួតដ៏លំបាក ជាមួយបញ្ហាជាការរបួសសរសៃពួរ ។ កាលពីឆ្នាំ ២០២២ កីឡាករវ័យ​ ៣៥ឆ្នាំរូបនេះ ខកខានការប្រកួតកម្មវិធីដ៏ធំនៅអូស្ត្រាលីនេះ ដោយសារតែបញ្ហានៃការចាក់វ៉ាក់សាំងកូវីដ-១៩ ដែលរូបគេបានបដិសេធ ហើយត្រូវបានអូស្ត្រាលីបណ្តេញចេញពីប្រទេស។ 
 

កីឡាករសញ្ជាតិស៊ែប៊ីបន្ថែមដូច្នេះថា៖«នៅពេលខ្ញុំទៅកាន់ទីកន្លែងរបស់ខ្ញុំ ទឹកមុខរបស់ខ្ញុំចាប់ផ្តើមផ្លាស់ប្តូរដោយមានទឹកភ្នែកស្រកចុះមក ហើយដែលម្តាយខ្ញុំនិងប្អូនខ្ញុំបានមកឱបខ្ញុំ។ ព្រោះថាមកដល់ពេលនេះ ខ្ញុំមិនដែលបណ្តោយខ្លួនឱ្យរវល់រឿងក្រៅទីលាននោះទេ ហើយការជម្នះផ្សេងៗលើបញ្ហារបួស បានធ្វើឱ្យខ្ញុំបានផ្តោតអារម្មណ៍ខ្លាំងបើទោះវាបានរំខានក្តី ហេតុដូចនេះទើបខ្ញុំរំភើបខ្លាំងបែបនេះ។»។ 
 

មិនត្រឹមតែបញ្ហារបួសនោះឡើយ ប៉ុន្តែកីឡាកររូបនេះក៏ត្រូវដោះស្រាយបញ្ហានានា ក្នុងនោះបញ្ហាឪពុកខ្លួន លោក Srdjan Djokovic ត្រូវបានគេឃើញថា បានបង្ហាញគោលជំហរគាំទ្រប្រទេសរុស្ស៊ី ដោយបានកាន់ទង់ជាតិរុស្ស៊ីចូលក្នុងកីឡដ្ឋានប្រកួត អំឡុងពេល Djokovic ប្រកួតប៉ះគ្នាជាមួយកីឡាករអាម៉េរិក Tommy Paul ជាដើម៕