តាមរយៈការបង្កើត«ឃុំកសិកម្មគំរូ»នេះ លោក យ៉ង សាំងកុមារ យល់ឃើញដូច្នេះ៖ «ខ្ញុំយល់ឃើញថាការដែលមានមន្រ្តីកសិកម្មថ្នាក់ឃុំនៅចាំបម្រើកសិករ នឹងជួយច្រើន ជាពិសេសជួយគាំទ្រដល់កសិករអាចទទួលបានភាពជោគជ័យក្នុងរបរកសិកម្ម និងបានប្រាក់ចំណូលខ្ពស់»។
ដើម្បីឆ្ពោះទៅកាន់ «ឃុំកសិកម្មគំរូ» ដែលអាចជួយលើកកម្ពស់ជវីភាពប្រជាកសិករ គឺត្រូវការមន្រ្តីកសិកម្ម១នាក់ ទៅ២នាក់ក្នុងមួយឃុំ។ លោក យ៉ង សាំងកុមារ បន្តថា ក្នុង«ឃុំកសិកម្មគំរូ» ក៏នឹងរៀបចំឱ្យមានក្រុមកសិករគំរូ ដែលមានភាពច្នៃប្រឌិត និងសហគមន៍កសិកម្ម ដែលផ្សារភ្ជាប់ជាមួយទីផ្សារផងដែរ។
រូបភាពពីលោក យ៉ង សាំងកុមារ
ទន្ទឹមនឹងនេះ គម្រោង «ឃុំកសិកម្មគំរូ» ក៏ត្រូវការមេភូមិដែលសកម្ម និងមានជំនាញក្នុងការងារកសិកម្ម។ ជាមួយគ្នានេះ ដើម្បីឱ្យការអនុវត្តគម្រោងនេះ មានប្រសិទ្ធភាព គឺមិនអាចខ្វះបាននូវការគាំទ្រពីខាងក្រៅ ដូចជាមន្រ្តីជំនាញពីថ្នាក់ស្រុក-ខេត្ត ដែលជួយគាំទ្របច្ចេកទេសផ្សេងៗ។
«បញ្ហាទីផ្សារ,ទុន,ជី,ពូជ និងបច្ចេកទេស» ជាបញ្ហាដែលកសិករមួយចំនួនបានជួបប្រទះ។ ដើម្បីសម្រួលការលំបាករបស់កសិករ លោក យ៉ង សាំងកុមារ លើកឡើងបែបនេះ៖«យើងនឹងបែងចែកកសិករនៅក្នុងឃុំ ជា៣ក្រុមធំៗ មានកសិករដាំដុះសម្រាប់ហូប, កសិករដាំហូប ហើយសល់ទុកលក់ និងក្រុមកសិករផលិតសម្រាប់លក់»។
បើតាមលោក យ៉ង សាំងកុមារ ការងារដាំដុះផ្សារភ្ជាប់នឹងជាទីផ្សារជារឿងសំខាន់ សម្រាប់កសិករដែលផលិតដើម្បីទីផ្សារ។ គម្រោងនេះ នឹងជ្រើសរើសកសិកម្មដែលស្ម័គ្រចិត្ត ដោយកសិករនឹងទទួលបានការគាំទ្រផ្នែកបច្ចេកទេស និងទីផ្សារ។
រូបភាពពីលោក យ៉ង សាំងកុមារ
«វាអាស្រ័យលើកត្តាមួយចំនួនដែរ។ ទី១ ធនធានមនុស្ស, ទី២ ធនធានថវិកា, ទី៣ ការចូលរួមពីអាជ្ញាធរមូលដ្ឋាន និងទី៤ គឺកសិករផ្ទាល់»។ នេះជាការលើកឡើងរបស់បណ្ឌិត យ៉ង សាំងកុមារ ជុំវិញការធ្វើឱ្យគម្រោង «ឃុំកសិកម្មគំរូ»ទទួលបានជោគជ័យ។
ក្នុងជំហានដំបូង លោក យ៉ង សាំងកុមារ នឹងចាប់ផ្ដើមអនុវត្តនៅឃុំចំនួន ១០។ ឃុំដែលអនុវត្តមុនគេ គឺឃុំ ស្ថិតក្នុងស្រុកជើងព្រៃ ខេត្តកំពង់ចាម។ ក្រៅពីជួយដល់កសិករដែលជួបបញ្ហា គម្រោងនេះ ក៏នឹងផ្ដល់ឱកាសដល់និស្សិតកសិកម្ម ដែលសិក្សានៅតាមវិទ្យាស្ថាន និងសាកលវិទ្យាល័យ ពាក់ព័ន្ធនឹងកសិកម្មផងដែរ។
សូមបញ្ជាក់ថា ក្នុងមហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជា នៅថ្ងៃទី២៨-២៩ ខែមករា គណបក្សប្រជាជនកម្ពុជា បានដាក់ចេញគោលនយោបាយ ពង្រាយអ្នកបច្ចេកទេសកសិកម្ម តាមភូមិ-ឃុំ ប្រសិនបើបក្សរបស់ខ្លួន ឈ្នះឆ្នោត នៅអាណាត្តិទី៧ ឆ្នាំ២០២៣។ នេះបើតាមការបញ្ជាក់របស់លោក សុខ ឥសាន អ្នកនាំពាក្យគណបក្សប្រជាជនកម្ពុជា៕