ក្រោយបិទបញ្ចប់គោលនយោបាយសូន្យកូវីដ ការរាលដាលជំងឺកូវីដ-១៩ នៅចិនផ្ទុះឡើងខ្លាំងនៅចុងឆ្នាំ២០២២។ កូរ៉េខាងត្បូងក៏បានចាត់វិធានការរឹតត្បិតចំពោះអ្នកដំណើរមកពីចិនដោយតម្រូវឱ្យមានលទ្ធផលតេស្តកូវីដ-១៩ អវិជ្ជមានមុនចេញដំណើរ និងត្រូវធ្វើតេស្ត PCR ម្ដងទៀតពេលទៅដល់ប្រទេសខ្លួន។ ទីក្រុងសេអ៊ូលក៏បានផ្អាកការចេញទិដ្ឋាការរយៈពេលខ្លីសម្រាប់ជន​ជាតិ​ចិនចាប់ពីថ្ងៃទី២ ខែមករា រហូតដល់ចុងខែកុម្ភៈផងដែរ។
 

ស្របពេលវិធានការនេះប៉ះពាល់ខ្លាំងដល់អ្នកដំណើ នាយករដ្ឋមន្ត្រីកូរ៉េខាងត្បូង លោក Han Duck-soo នៅថ្ងៃទី៣១ ខែមករា បាននិយាយថាទីក្រុងសេអ៊ូលអាចពិចារណាដកការរឹតបន្តឹងលើទិដ្ឋាការរយៈពេលខ្លីសម្រាប់អ្នកធ្វើដំណើរពីចិនមុនដាច់ខែកុម្ភៈ ប្រសិនបើស្ថានភាពឆ្លងជំងឺកូវីដ-១៩ នៅចិនអាចគ្រប់គ្រងបាន។ នេះបើតាមទីភ្នាក់ងារព័ត៌មាន Yonhap។
 

«ប្រសិនបើស្ថានភាពនៅអាចគ្រប់គ្រងបាន ដែលអាចទទួលបានលទ្ធផលតាមការធ្វើតេស្ត PCR នោះការលើកចោលការរឹតបន្តឹងអាចពិចារណាធ្វើមុនកាលកំណត់»។ លោក Han លើកឡើងបែបនេះ។ គម្រោងផ្ដល់ទិដ្ឋាការរយៈពេលខ្លីឡើងវិញដល់អ្នកដំណើរចិន នឹងជួយ​វិស័យ​ទេសចរណ៍ និង​អាកាសចរ​ណ៍របស់កូរ៉េខាងត្បូងរង​ការប៉ះពាល់យ៉ាងខ្លាំង។ 
 

អគ្គនាយករងក្រុមហ៊ុនអាកាសចរណ៍ Korean Air លោក Kim Ah-hyun និយាយថា ចិនធ្លាប់មានចំណែកពី២០ទៅ២៥ភាគរយនៃអ្នកដំណើរ និងដឹកទំនិញរបស់ក្រុមហ៊ុនលោកមុនពេលមានការរាលដាលជំងឺកូវីដ-១៩។ អគ្គនាយករងក្រុមហ៊ុនអាកាសចរណ៍មួយនេះសង្ឃឹមថា ការរឹតបន្តឹងការធ្វើដំណើររវាងប្រទេសទាំងពីរត្រូវបានបន្ធូរបន្ថយក្នុងពេលឆាប់ៗ ដើម្បីអនុញ្ញាតឱ្យមានជើងហោះហើរច្រើនឡើងវិញ។ ហាង​ទំនិញ​រួច​​ពន្ធក៏​ទទួល​រង​ផល​ប៉ះពាល់​យ៉ាង​ខ្លាំងដែរ ព្រោះឈ្មួញចិនដែល​តែងទិញទំនិញទៅលក់នៅចិនមិនអាចធ្វើដំណើរទៅមកបាន។
 

គួរបញ្ជាក់ថា ក្រោយកូរ៉េខាងត្បូងផ្អាកការចេញទិដ្ឋាការរយៈពេលខ្លីដល់អ្នកដំណើរចិន ចិនក៏បានឆ្លើយតបដោយការផ្អាកទិដ្ឋាការសម្រាប់អ្នកដំណើរកូរ៉េខាងត្បូងវិញដែរ រួមនិងជប៉ុនទៀតផង៕