ជាទំនៀមពីបុរាណដែលធ្វើមិនដែលដាច់ពីដូនតាមក ពិធីបុណ្យចាប់ត្រីរបស់អ្នកភូមិបង្កោង ត្រូវបានគេមើលឃើញថា បានបង្ហាញពីសាមគ្គីភាពនៃអ្នកភូមិ។ ពិធីនេះតែងធ្វើឡើងនៅថ្ងៃ២កើត ខែមាឃ គឺមុនមួយថ្ងៃ នៃពិធីបុណ្យឡើងមាឃ ឬឡើងអ្នកតា ដែលអ្នកភូមិគោរពអរគុណ និងបួងសួង សុំសេចក្ដីសុខពីអ្នកតាម្ចាស់ស្រុក ដែលឃុំគ្រងថែរក្សាពួកគេសុខសប្បាយរយៈពេលពេញមួយឆ្នាំ​កន្លងមក។ បុណ្យនេះ គេតែងធ្វើនៅក្រោយរដូវច្រូតកាត់ផងដែរ។ 

 

មេភូមិបង្កោង លោក ព្រេជ ឃិន លើកឡើងថា ការចុះចាប់ត្រីក្នុងបឹងអភិរក្សនេះ អនុញ្ញាតឱ្យអ្នកភូមិប្រើ​ត្រឹមឧបករណ៍បុរាណតែប៉ុណ្ណោះ មានអង្រុត ឈ្នាង និងសំណាញ់ជាដើម។ ថ្នាក់គ្រប់គ្រងភូមិ នឹងប្រកាស​កំណត់​យកពេលវេលាសមស្របណាមួយក្នុងខែមាឃ ដើម្បីឱ្យពលរដ្ឋ ត្រៀមសម្រាប់​ពិធីចាប់ត្រីនេះ។  លោកបញ្ជាក់ថា នៅថ្ងៃនោះ អ្នកភូមិមកជាលក្ខណៈគ្រួសារ ប្រើជំនាញរបស់ខ្លួនដើម្បី ចាប់ត្រី និងភាគច្រើនចម្អិនហូបនៅហ្នឹងកន្លែងនោះ ហើយមួយផ្នែកទៀត ទុកធ្វើសម្លនំបញ្ចុកយកទៅ ឡើងមាឃនៅសាលាឆទាននាថ្ងៃបន្ទាប់។