បញ្ហាលេងល្បែងស៊ីសង គឺជាបញ្ហាចោទដែលធ្វើឱ្យអាជ្ញាធរឃុំកំពង់ស្វាយពិបាកលុបបំបាត់ខ្លាំងណាស់ ​ព្រោះនៅតែមានការលួចលាក់លេង។ ម្យ៉ាងទៀតប៉ុស្តិ៍ក៏មានកម្លាំងមិនគ្រប់គ្រាន់ ដែលធ្វើឱ្យការតាមដានករណីនេះ នៅមានចន្លោះខ្វះខាត។ យ៉ាងណាក៏ដោយ ក៏លោក ប៉ាង ម៉េង នៅតែបន្តអប់រំ ណែនាំដល់ពលរដ្ឋនៅក្នុងឃុំកុំឱ្យប្រព្រឹត្តសកម្មភាពលេងល្បែងស៊ីសងនេះ ដើម្បីភាពសុខដុមនៅក្នុងឃុំឱ្យបានជាប់ជាប្រចាំ។​

ពាក់ព័ន្ធនឹងករណី នេះ អ្នកស្រី អ៊ូ សុខខេម ជាពលរដ្ឋនៅក្នុងភូមិចុងព្រៃ ឃុំកំពង់ស្វាយ មិនសូវសប្បាយចិត្តនោះឡើយ នៅពេល​នៅក្នុងឃុំរបស់ខ្លួនមានសកម្មភាពលេងល្បែងស៊ីសង។ ពលរដ្ឋរូបនេះ លើកឡើងថា ​លេងល្បែងនេះ មិនបាននាំផលចំណេញអ្វី​នោះទេ គឺមានតែការខាតពេលវេលា ​បង់ទ្រព្យសម្បត្តិ និងអាចមានជម្លោះក្នុងក្រុមគ្រួសារទៀតផង។ អ្នកស្រី សុខខេម បានបន្តថា៖«ខ្ញុំឃើញនៅក្នុងភូមិខ្ញុំភាគច្រើន អ្នកភូមិគាត់លេងបៀរច្រើន អ្នកខ្លះញៀ​ន​​​រហូតដល់អត់ហូបបាយ ហូបទឹកក៏មានដែរ! ធ្វើឱ្យប៉ះពាល់ដល់កូនមិនបានសិក្សារៀនសូត្រទៀត »។