គោលបំណងនៃសន្និសីទសារព័ត៌មាននេះ គឺដើម្បីបង្ហាញជូនសាធារណជន ពីបច្ចុប្បន្នភាពនៃស្ថានភាព និងសុខភាព នៃវិស័យធនាគារ និងហិរញ្ញវត្ថុ ព្រមទាំងផ្សព្វផ្សាយពីផែនការសកម្មភាព ដែលសមាគមទាំងពីរ បាននិងកំពុងដាក់ចេញ ក្នុងការជំរុញបរិយាបន្នហិរញ្ញវត្ថុ និងចំណេះដឹងផ្នែកហិរញ្ញវត្ថុ នៅឆ្នាំ២០២៣ និងឆ្នាំបន្តបន្ទាប់។ 

 

​នាសន្និសីទសារព័ត៌មានដ៏សំខាន់នេះ ក៏បានជជែក ពិភាក្សា និងបកស្រាយអំពីសេចក្តីថ្លែងការណ៍រួម ដែលចេញដោយធនាគារជាតិនៃកម្ពុជា និងអគ្គស្នងការនគរបាលជាតិ កាលពីថ្ងៃទី​២ ខែកុម្ភៈ ឆ្នាំ២០២៣ ស្តីពីការចាត់វិធានការផ្លូវច្បាប់យ៉ាងតឹងរ៉ឹង ចំពោះការផ្តល់ប្រាក់កម្ចីខុសច្បាប់ និងការផ្សាយពាណិជ្ជកម្មគ្រប់ប្រភេទ ពាក់ព័ន្ធនឹងការផ្តល់សេវាហិរញ្ញវត្ថុ ដែលគ្មានច្បាប់អនុញ្ញាត និងបានសំណូមពរដល់ប្រជាពលរដ្ឋ ត្រូវចៀសវាងដាច់ខាត ចំពោះការខ្ចីប្រាក់ ពីអ្នកផ្តល់សេវាហិរញ្ញវត្ថុក្រៅផ្លូវការ ដែលពុំមានការអនុញ្ញាតពីធនាគារជាតិនៃកម្ពុជា​។ ​ប្រជាពលរដ្ឋដែលមានព័ត៌មាន ពាក់ព័ន្ធនឹងសកម្មភាពផ្តល់ឥណទានខុសច្បាប់ សូមរាយការណ៍ទៅធនាគារជាតិនៃកម្ពុជា៕