អន្តរជាតិ
ជប៉ុននិងហ្វីលីពីន ប្ដេជ្ញាពង្រឹងទំនាក់ទំនងទ្វេភាគីឱ្យជិតស្និទ្ធជាងមុន
× មេដឹកនាំជប៉ុននាថ្ងៃទី៩ ខែកុម្ភៈបានលើកឡើងថា ទីក្រុងតូក្យូកំពុងសម្លឹងមើលការពង្រឹងសមយុទ្ធរួមគ្នាជាមួយហ្វីលីពីន ខណៈដែលប្រទេសទាំងពីរបានសន្យាជំរុញឱ្យទំនាក់ទំនងទ្វេភាគីជិតស្និទ្ធជាមុន ប្រឈមមមុខការតានតឹងជាមួយចិន។
ប្រធានាធិបតីហ្វីលីពីន Ferdinand Marcos Jr. កំពុងបំពេញទស្សនកិច្ចនៅទីក្រុងតូក្យូ ហើយបានជួបជាមួយនាយករដ្ឋមន្រ្តី គីស៊ីដា ហ្វូមីអូ នៅថ្ងៃទី៩ ខែកុម្ភៈ។ ពីជំនួបនៅតូក្យូ លោក គីស៊ីដា និយាយថា ភាគីទាំងពីរបានព្រមព្រៀងគ្នាដើម្បីសាកល្បង និងបង្កើតក្របខណ្ឌមួយដែលនឹងពង្រឹងដំណើរការការធ្វើសមយុទ្ធរួមគ្នារបស់ប្រទេសទាំងពីរឱ្យកាន់តែរលូនជាងមុន។
«ក្នុងឆ្នាំដែលស្ថានភាពអន្តរជាតិមានភាពដ៏ស្មុគស្មាញ ជប៉ុនបានផ្សារភ្ជាប់ចំណងដ៏សំខាន់ដើម្បីសហការជាមួយហ្វីលីពីន»។នាយករដ្ឋមន្ត្រីជប៉ុនបញ្ជាក់បែបនេះផងដែរ។
ទន្ទឹមនេះ ប្រធានាធីបតីហ្វីលីពីន Marcos Jr. បញ្ជាក់ថា ក្រោយជំនួយទ្វេភាគី លោកជឿជាក់លើភាព ដៃគូយុទ្ធសាស្ត្រដែលរឹងមាំជាងមុន ហើយមានជំហររួមគ្នាលើបញ្ហានៅក្នុងតំបន់។ លោក Marcos បន្តថា លោកបានយល់ព្រមដើម្បីធ្វើការជិតសិទ្ធិជាងមុនជាមួយក្រុងតូក្យូលើវិស័យមួយចំនួនរួមទាំងកិច្ចសហប្រតិបត្តិការការពារជាតិ និងសន្ដិសុខដែនសមុទ្រ។
អំឡុងជំនួបខាងលើ ប្រទេសទាំងពីរក៏បានចុះហត្ថលេខាលើកិច្ចព្រមព្រៀងមួយដើម្បីអនុញ្ញាតឱ្យកង កម្លាំងប្រដាប់អាវុធប្រទេសទាំងពីរធ្វើការជាមួយគ្នាអំឡុងពេលប្រតិបត្តិការសង្គ្រោះក្នុងគ្រោះមហន្តរាយ។ កិច្ចព្រមព្រៀងនេះ ត្រូវមើលឃើញថា ជាការបោះជំហានឆ្ពោះទៅរកការអនុញ្ញាតឱ្យប្រទេសទាំងពីរដាក់ពង្រាយកម្លាំងនៅដីគ្នាទៅវិញទៅមក។
គួរបញ្ជាក់ថា ទីក្រុងតូក្យូមានកិច្ចព្រមព្រៀងបែបនេះជាមួយអូស្ត្រាលី និងអង់គ្លេសផងដែរ។ វត្តមានយោធារបស់ជប៉ុននៅហ្វីលីពីន ក៏អាចជួយទីក្រុងម៉ានីលទប់ទល់នឹងឥទ្ធិពលរបស់ចិននៅក្នុងសមុទ្រចិនខាងត្បូងដែលជាតំបន់ជម្លោះយូរអង្វែងមួយដែរ៕
© រក្សាសិទ្ធិដោយ thmeythmey.com