លោក ស៊ូវ តុង ជឿជាក់ថាក្រុមរាំ Breakdance នឹងទទួលបានមេដាយស៊ីហ្គេមក្រោយហាត់នៅជប៉ុន៣ខែ

កីឡាជាតិ

ជាតិ

ស៊ីហ្គេម២០២៣

លោក ស៊ូវ តុង ជឿជាក់ថាក្រុមរាំ Breakdance នឹងទទួលបានមេដាយស៊ីហ្គេមក្រោយហាត់នៅជប៉ុន៣ខែ

10, Feb 2023 , 12:59 pm

រូបភាព

លោក ស៊ូវ តុង នាយកបច្ចេកទេសសហព័ន្ធកីឡារាំកម្ពុជា ក្នុងពេលបង្វឹករាំដល់កីឡាករ-កីឡាការិនីជម្រើសជាតិ និងថ្នាលនៅសាលហ្វឹកហ្វឺនកីឡារាំកម្ពុជា។

ដោយ:

លោក ស៊ូវ តុង នាយកបច្ចេកទេសសហព័ន្ធកីឡារាំកម្ពុជា ជឿជាក់យ៉ាងមុតមាំចំពោះវិញ្ញាសា Breakdance ថានឹងទទួលបានមេដាយនៅស៊ីហ្គេម២០២៣ ដ្បិតអត្តពលិកបានចេញទៅហ្វឹកហាត់នៅជប៉ុនទាំងអស់សុទ្ធសឹងតែមានការអត់ធ្មត់ និងតស៊ូបំផុត។

ក្នុងបទសម្ភាសផ្ទាល់ជាមួយសារព័ត៌មានថ្មីៗ នៅថ្ងៃទី៩ ខែកុម្ភៈ នៅសាលហ្វឹកហ្វឺនកីឡារាំកម្ពុជា ក្នុងបរិវេណពហុកីឡដ្ឋានជាតិអូឡាំពិក នាយកបច្ចេកទេសសហព័ន្ធកីឡារាំអះអាងថា វិញ្ញាសា Breakdance មានយូរមកហើយនៅកម្ពុជា តែមិនមានវត្តមានក្នុងសហព័ន្ធកីឡារាំ។ ប៉ុន្តែក្រោយវិញ្ញាសានេះបានដាក់បញ្ចូលក្នុងការប្រកួតកីឡាស៊ីហ្គេមលើកទី៣២ សហព័ន្ធបានចងក្រងឡើងមកវិញ។

លោក ស៊ូវ តុង និយាយថា៖«កីឡា Breakdance តាមពិតនៅស្រុកខ្មែរមានជាង១០ឆ្នាំហើយ ប៉ុន្តែពួកគាត់មិនទាន់បានចូលជាសហព័ន្ធ។ មួយរយៈហ្នឹងយើងបានប្រមូលគ្នាមកចូលរួមដោយសារតែវិញ្ញាសា Breakdance ត្រូវបានដាក់ចូលក្នុងការប្រកួតកីឡាស៊ីហ្គេម២០២៣ ដែរ»។

ក្រោយមានការសហការឧបត្ថម្ភពីភាគីជប៉ុន សហព័ន្ធបានបញ្ជូនអត្តពលិកកីឡារាំ ៤រូប ទៅហ្វឹកហាត់ នៅប្រទេសជប៉ុន រយៈពេល៣ខែផងដែរ មុនការមកដល់ព្រឹត្តិការណ៍ប្រវត្តិសាស្ត្រដំបូងនៅកម្ពុជា។ នាយកបច្ចេកទេសសហព័ន្ធកីឡារាំកម្ពុជារូបនេះ ក៏សង្ឃឹមថា វិញ្ញាសារាំ Breakdance នឹងទទួលបាន លទ្ធផលល្អក្រោយការហ្វឹកហ្វឺននៅប្រទេសជប៉ុន។

សកម្មភាពក្រុមរាំ Breakdance ហ្វឹកហាត់នៅប្រទេសជប៉ុន។ រូបពី សហព័ន្ធកីឡារាំកម្ពុជា

លោក ស៊ូវ តុង សង្ឃឹមយ៉ាងមុតមាំថា វិញ្ញាសា Breakdance នឹងទទួលផលល្អដោយសារតែខាងជប៉ុនសុទ្ធ តែអ្នកល្បី ពូកែខាងរាំ។ «ភាគីជប៉ុនទទួលយើងទៅហ្វឹកហាត់ ហើយអត្តពលិកកម្ពុជា ដែលទៅហ្វឹកហាត់ សុទ្ធ តែមានបទពិសោធ ពិសេសពួកគាត់សុទ្ធតែមានចិត្តតស៊ូ និងចចង់ហ្វឹកហាត់ ហើយនៅជប៉ុនដាក់ពេល វេលាយ៉ាងតឹងតែងបំផុត»។ នេះជាការបញ្ជាក់របស់លោក ស៊ូវ តុង។

ក្រុមកីឡារាំ វិញ្ញាសា Breakdance ដែលមានកីឡាករ៣រូប និងកីឡាការិនីមួយរូប បានចេញទៅ ប្រទេសជប៉ុនកាលពីចុងខែមករា ដើម្បីហ្វឹកហាត់នៅទីនោះរយៈពេល៣ខែ៕