អន្តរជាតិ
នយោបាយអន្តរជាតិ
មេដឹកនាំថៃ និងម៉ាឡេស៊ី ឯកភាពពង្រីកទំហំពាណិជ្ជកម្ម និងការអភិវឌ្ឍតាមតំបន់ព្រំដែន
នាយករដ្ឋមន្រ្តីម៉ាឡេស៊ី លោក អាន់វ៉ា អ៊ីប្រាហ៊ីម (ខាងឆ្វេង) និងសមភាគីថៃ លោកប្រាយុទ្ធ ចន្ទអូចា នៅក្រុងបាងកក ក្នុងថ្ងៃទី៩ ខែកុម្ភៈ។ រូបភាពយកពីTwitter របស់លោកអាន់វ៉ា អ៊ីប្រាហ៊ីម
×![]()
ដោយ: ធៀន ភារិន្ទ
នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម និងសមភាគីថៃ លោកប្រាយុទ្ធ ចន្ទអូចា ក្នុងថ្ងៃទី៩ ខែកុម្ភៈ បានឯកភាពពង្រីកទំហំពាណិជ្ជកម្មទ្វេភាគី និងជជែកលើការអភិវឌ្ឍសេដ្ឋកិច្ចនៅតាមបណ្តោយព្រំដែន។ 
ក្រោយពីឡើងកាន់តំណែងជានាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានធ្វើទស្សនកិច្ចជាបន្តបន្ទាប់នៅបណ្តាប្រទេសអាស៊ីអាគ្នេយ៍ដូចជា សិង្ហបុរី ម៉ាឡេស៊ី និងព្រុយណេជាដើម។ ចុងក្រោយ លោក អាន់វ៉ា បានធ្វើទស្សនកិច្ចនៅថៃរយៈពេល ២ថ្ងៃថែមទៀត ដើម្បីស្វែងរកការពង្រឹងកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងទំនាក់ទំនងទ្វេភាគី។
ក្នុងសន្និសីទសារព័ត៌មានរួមគ្នាក្នុងថ្ងៃទី៩ ខែកុម្ភៈ លោកប្រាយុទ្ធ ចន្ទអូចា ប្រមុខរដ្ឋាភិបាលថៃ បានថ្លែងថា ជំនួបជាមួយសមភាគីម៉ាឡេស៊ី បានផ្តល់លទ្ធផលដ៏ល្អ ក្នុងការពង្រឹងទំនាក់ទំនងទ្វេភាគីនៅថ្ងៃអនាគត។
ទន្ទឹមនេះ មេដឹកនាំប្រទេសទាំងពីរ បានឯកភាពលើការពង្រីងទំហំពាណិជ្ជកម្មផង។ ម៉ាឡេស៊ី និងថៃមានបំណងចង់បង្កើនទំហំពាណិជ្ជកម្មប្រចាំឆ្នាំឱ្យបាន ៣០ពាន់លានដុល្លារ ត្រឹមឆ្នាំ២០២៥។ តាមការចុះផ្សាយរបស់សារព័ត៌មាន Bernama ក្នុងខែមករា ទំហំពាណិជ្ជកម្មសរុបរបស់ប្រទេសទាំងពីរមានចំនួនជិត ២៦ពាន់លានដុល្លារ គិតត្រឹមឆ្នាំ២០២២។
មិនតែប៉ុណ្ណោះ លោក ប្រាយុទ្ធ និងលោក អាន់វ៉ា បានពិភាក្សាពីការអភិវឌ្ឍសេដ្ឋកិច្ចនៅតាមតំបន់ព្រំដែនប្រទេសទាំងពីរផង។
បន្ថែមពីប្រធានបទខាងលើ បញ្ហាការបះបោរនៅភាគខាងត្បូងថៃ និងវិបត្តិនយោបាយនៅមីយ៉ាន់ម៉ា ក៏ជារបៀបវារៈដ៏សំខាន់មួយក្នុងជំនួបទ្វេភាគីលើកដំបូងនេះផង។ ក្នុងសន្និសីទសារព័ត៌មានរួមគ្នានោះ លោក ប្រាយុទ្ធ និងលោក អាន់វ៉ា បានឯកភាពថា ម៉ាឡេស៊ីនឹងធ្វើជាសន្ធានការី ដើម្បីជួយឱ្យមានកិច្ចចរចាសន្តិភាពរវាងរដ្ឋាភិបាលថៃ និងក្រុមបះបោរនាពេលខាងមុខ។
ការបះបោរនៅភាគខាងត្បូងថៃ បានកើតឡើងជាច្រើនទស្សវត្សរ៍មកហើយ ដោយតំបន់នោះភាគច្រើនគ្រប់គ្រងដោយក្រុមបះបោរមូស្លីម-ម៉ាឡេ។ ក្រុមបះបោរមូស្លីម-ម៉ាឡេមានបំណងផ្តាច់ទឹកដី និងបង្កើតរដ្ឋឯករាជ្យមួយពីថៃ។
ចំណែកបញ្ហានៅមីយ៉ាន់ម៉ាវិញ លោកអាន់វ៉ា បានប្រាប់អ្នកសារព័ត៌មានថា ពួកគេបានជជែកពីការចូលរួមដ៏សំខាន់ជាមួយយោធាមីយ៉ាន់ម៉ា។ យ៉ាងណាមិញ កិច្ចពិភាក្សាជុំវិញប្រធានបទនេះ មិនត្រូវបានមេដឹកនាំថៃ និងម៉ាឡេស៊ី លម្អិតឡើយ៕
Tag:
ថៃ
ម៉ាឡេស៊ី
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
