តាមទិន្នន័យដែលផ្តល់ពីអាជ្ញាធរតួកគីត្រឹមថ្ងៃទី៩ ខែកុម្ភៈ មនុស្សក្បែរ ១៨០០០នាក់នៅតួកគី និងប្រជាជននៅស៊ីរីលើសពី៣០០០នាក់ បានបាត់បង់ជីវិត ។ ទន្ទឹមនេះ ប្រជាជននៅតួកគីចំនួន៧២០០០នាក់ផ្សេងទៀត បានរងរបួសក្នុងគ្រោះរញ្ជួយដីនោះ។ 

 

ស្របគ្នានេះ វាកាន់តែមានស្ថានភាពលំបាកសម្រាប់ក្រុមអ្នកជួយសង្រ្គោះ ដែលកំពុងសស្រាក់យកគំនរអគារចេញ ដោយសារតែអាកាសធាតុត្រជាក់។ 

 

ដោយសារស្ថានភាពកាន់តែលំបាក អគ្គលេខាធិការអង្គការសហប្រជាជាតិ លោក អាន់តូនីញ៉ូ ហ្គូតេរ៉េស បានអំពាវនាវរកជំនួយហិរញ្ញវត្ថុបន្ថែមពីសហគមន៍អន្តរជាតិសម្រាប់តួកគី និងស៊ីរី។ មិនតែប៉ុណ្ណោះ ប្រមុខ UN ក៏បានស្នើឱ្យមានការផ្តល់ជំនួយជាច្រើនទៅក្នុងតំបន់រងគ្រោះនៅស៊ីរីផង។ 

 

«ជំនួយជាច្រើនកំពុងតែត្រូវបានដឹកជញ្ជូន ប៉ុន្តែជំនួយកាន់តែច្រើន គឺចាំបាច់»។ អគ្គលេខាធិការអង្គការសហប្រជាជាតិ បានសង្កត់ធ្ងន់បែបនេះ ដោយបន្តថា អង្គការសហប្រជាជាតិនឹងចាប់ផ្តើមកៀងគរមូលនិធិសម្រាប់តួកគី​ និងស៊ីរីនៅសប្តាហ៍ក្រោយ។ 

 

ក្នុងថ្ងៃទី៩ ខែកុម្ភៈដដែលនោះ អាម៉េរិក បានបន្ធូរបន្ថយទណ្ឌកម្មរបស់ខ្លួនសម្រាប់តំបន់រងគ្រោះដោយសាររញ្ជួយដីនៅស៊ីរីផង។ តាមការបញ្ជាក់របស់អនុរដ្ឋមន្រ្តីហិរញ្ញវត្ថុអាម៉េរិក លោក Wally Adeyemo នៅក្នុងសេចក្តីថ្លែងការណ៍មួយ ការបន្ធូរបន្ថយនេះ គឺដើម្បីជួយសង្រ្គោះជីវិតមនុស្ស និងកសាងតំបន់នោះឡើងវិញ៕