កូរ៉េខាងត្បូង កាលពីដើមខែមករា បានបញ្ឈប់ការចេញទិដ្ឋាការរយៈពេលខ្លីនៅស្ថានកុងស៊ុលរបស់ខ្លួននៅចិន​ ដ្បិតព្រួយបារម្ភពីការកើនឡើងនៃករណីឆ្លងជំងឺកូវីដ-១៩ ​អំឡុងបុណ្យចូលឆ្នាំចិនកន្លងមក។ ទីក្រុងប៉េកាំង មិនសប្បាយចិត្តឡើយចំពោះវិធានការនេះ ហើយក៏ចេញចំណាត់ការដូចគ្នាវិញ។
 

ស្របពេលស្ថានភាពនៅចិនប្រសើរឡើង លោក Kim Sung-ho អនុរដ្ឋមន្ត្រីក្រសួងមហាផ្ទៃកូរ៉េខាងត្បូង ទទួលបន្ទុកការគ្រប់គ្រងគ្រោះមហន្តរាយ និងសុវត្ថិភាព បាននិយាយថា រដ្ឋាភិបាលកូរ៉េខាងត្បូងបានសម្រេចចិត្តចាប់ផ្តើមការចេញទិដ្ឋាការឡើងវិញឱ្យអ្នកដំណើរមកពីចិន ដ្បិតមើលឃើញស្ថានភាពជំងឺកូវីដ-១៩ចិនហាក់មានភាពប្រសើរឡើង។ ប៉ុន្តែអ្នកដំណើរមកពីចិន នៅតែតម្រូវឱ្យធ្វើតេស្តកូវីដ-១៩ដដែល។ 
 

នាយករដ្ឋមន្ត្រីកូរ៉េខាងត្បូង លោក Han Duck-soo កាលពីសប្តាហ៍មុនបានណែនាំឱ្យអាជ្ញាធរដកការរឹតបន្តឹងលើអ្នកដំណើរឱ្យបានមុនដំណាច់ខែកុម្ភៈ ប្រសិនបើស្ថានភាពជំងឺកូវីដ-១៩នៅចិនមានភាពប្រសើរឡើងនិងអាចគ្រប់គ្រងបាន។ 
 

យោងតាមទិន្នន័យពីទីភ្នាក់ងារគ្រប់គ្រង និងបង្ការជំងឺកូរ៉េខាងត្បូង ក្នុងចំណោមអ្នកដំណើរមកពីចិនប្រមាណ១ម៉ឺននាក់ដែលចូលមកកូរ៉េខាងត្បូងចាប់ពីថ្ងៃទី ២ ខែមករាកន្លងមក អាជ្ញាធរកូរ៉េខាងត្បូងធ្វើតេស្តឃើញវិជ្ជមាន​ជាង៧ភាគរយ៕