កាលពីឆ្នាំ ២០២១ លោក Scaloni ជាប់ត្រឹមចំណាត់ថ្នាក់លេខ ៤ ប៉ុណ្ណោះក្នុងនាមជាគ្រូបង្វឹកល្អប្រចាំឆ្នាំ ។ ហើយឆ្នាំដដែលគ្រូបង្វឹកអាហ្សង់ទីនរូបនេះ បានជួយក្រុមជម្រើសជាតិអាហ្សង់ទីនឈ្នះពានរង្វាន់ Copa America 2021។ ឈានដល់ឆ្នាំ ២០២២ លោកជួយអាហ្សង់ទីនឈ្នះពានរង្វាន់ Finalissima និងចុងក្រោយ World Cup 2022 នៅប្រទេសកាតា។ 
 

សម្រាប់លោក Carlo Ancelotti នៅតែជាគ្រូបង្វឹកដ៏ល្អ សម្រាប់ក្រុម Real Madrid ក្រោយវិលត្រលប់មកដឹកនាំក្រុមក្នុងឆ្នាំ ២០២២ វិញ ។ លោកបានជួយកែប្រែស្ថានការណ៍ ក្រមយក្សអេស្ប៉ាញឱ្យឈ្នះពាន UEFA Champions League ដោយឈ្នះលើ Liverpool ១-០។ លោក Ancelotti ជាគ្រូបង្វឹកដំបូងគេ ដែលឈ្នះពានរង្វាន់កំពូលអឺរ៉ុបធំៗចំនួន ៥លើក។ 
 

ចំណែកលោក Guardiola បានជួយដឹកនាំក្រុម Manchester City គ្រងជើងឯកលីគកំពូលអង់គ្លេស Premier League ​ជាបន្តបន្ទាប់ បើទោះបីជាក្រុមរងបរាជ័យក្នុងការប្រជែងនៅពានរង្វាន់ Champions League ក៏ដោយ។ កាលពីរដូវកាលមុន គូប្រជែងដ៏ខ្លាំងរបស់ Man City គឺ Liverpool ដែលបានដណ្តើមយកពាន FA Cup និង EFL Cup។ Guardiola បានឈ្នះពានរង្វាន់គ្រូបង្វឹកល្អនេះចំនួន ២លើករួចមកហើយ នៅក្នុងឆ្នាំ ២០១៩ និង ២០២១។
 

ដោយឡែកក្នុងនោះ FIFA បានបង្ហាញបេក្ខភាពគ្រូបង្វឹកស្ត្រីល្អដើម្បីប្រជែងបាន The Best FIFA Women’s Coach Award។ គ្រូបង្វឹកក្រុមស្ត្រីចំនួន ៣នាក់ មានអ្នកស្រី Sarina Wiegman គ្រូបង្វឹកក្រុមស្ត្រីអង់គ្លេស, Pia Sundhage គ្រូបង្វឹកក្រុមស្ត្រីប្រេស៊ីល និងអ្នកស្រី Sonia Bompaster គ្រូបង្វឹកក្រុម Lyon។

អ្នកស្រី Sarina Wiegman ធ្លាប់បានឈ្នះពានរង្វាន់នេះចំនួន ២លើករួចមក ដោយបានជួយដឹកនាំក្រុមតោកំណាចនារីអង់គ្លេសគ្រងជើងឯកពានរង្វាន់កំពូលអឺរ៉ុប Euro 2022 ក្រោយឈ្នះលើក្រុមនាទីអាល្លឺម៉ង់។ 
 

ចំណែកអ្នកស្រី Pia Sundhage សញ្ជាតិស៊ុយអែត បានជួយក្រុមនារីប្រេស៊ីលដណ្តើមបានពានរង្វាន់ Copa America Femenina ក៏មានវត្តមានចំណោមបេក្ខភាពល្អបំផុតទាំង ៣ ជាមួយអ្នកស្រី Sonia Bompastor គ្រូបង្វឹកក្រុមនារី Lyon ដែលទើបដឹកនាំក្រុមឈ្នះពានរង្វាន់ទាំងបី នៅទឹកដីបារាំងក្នុងឆ្នាំ ២០២២។ 

សូមជម្រាបថា ការប្រកាសបេក្ខភាពឈ្នះពានរង្វាន់ The Best FIFA Football Awards នឹងធ្វើឡើងនៅថ្ងៃទី២៧ ខែកុម្ភៈ ឆ្នាំ ២០២៣ រួមជាមួយការប្រគល់ពានរង្វាន់ដទៃទៀត៕