សហព័ន្ធកីឡាអូឡាំពិកវៀតណាម ដាក់គោលដៅដណ្តើមមេដាយមាស១០០ និងបញ្ចប់នូវចំណាត់ថ្នាក់លេខ៣ ពីការប្រកួតកីឡាស៊ីហ្គេមលើកទី៣២ ឆ្នាំ២០២៣ នៅប្រទេសកម្ពុជា ។ នេះបើតាមការចុះផ្សាយរបស់គេហទំព័រ Vietnam Plus នៅថ្ងៃទី១០ ខែកុម្ភៈ ឆ្នាំ២០២៣។

 

វៀតណាម នឹងចូលរួមប្រកួតលើ ៣០ប្រភេទកីឡាក្នុងព្រឹត្តិការណ៍កីឡាស៊ីហ្គេមនៅកម្ពុជា។ ជាមួយគ្នានេះ សហព័ន្ធកីឡាជាតិវៀតណាម ត្រៀមរៀបចំទីភ្នាក់ងារប្រឆាំងសារធាតុញៀននឹងកីឡា ដើម្បីត្រួតពិនិត្យយ៉ាងតឹងរឹងលើការញាំ និងការប្រើប្រាស់ថ្នាំ ដើម្បីជៀសវាងមានអត្តពលិកខ្លួន មានការលួចប្រើសារធាតុញៀន និងសារធាតុបំប៉ន ដែលច្បាប់ហាមឃាត់ មុនការប្រកួតស៊ីហ្គេមមកដល់។

 

គណៈកម្មាធិការកីឡាជាតិវៀតណាម បានស្នើឱ្យសហព័ន្ធនីមួយៗពន្លឿនការរៀបចំ និងការសម្រេចនូវផែនការ ដើម្បីបង្កើតលក្ខខណ្ឌអំណោយផល សម្រាប់អត្តពលិកឱ្យឈានដល់កម្រិតសមត្ថភាពខ្ពស់បំផុត។ វៀតណាម​ មិនបានដាក់បញ្ចូលកីឡាមួយចំនួនដូចជា ទូកកានូ, គូរ៉ាស, បាញ់កាំភ្លើង និងកីឡាកាយវប្បកម្ម ក្នុងការប្រកួតកីឡាស៊ីហ្គេមលើកទី៣២ ឡើយ។

 

គួរំលឹកថា វៀតណាម ជាប្រទេសដែលទទួលបានជោគជ័យខ្លាំងក្នុងព្រឹត្តិការណ៍កីឡាស៊ីហ្គេមលើកទី៣១ ដោយទទួលបានមេដាយមាសចំនួន ២០៥ ឈរតំណែងកំពូលតារាង ក្នុងនាមខ្លួនជាម្ចាស់ផ្ទះ៕