ប្រមុខរដ្ឋាភិបាលកម្ពុជា សម្តេច ហ៊ុន សែន បានប្រកាសនៅលើទឹកដីឡាវថា កម្ពុជា នឹងបញ្ជូនអ្នកទោសឡាវ ដែលកំពុងជាប់ឃុំនៅកម្ពុជា ឲ្យទៅអនុវត្តទោសនៅប្រទេសកំណើតវិញ។

សម្តេច ប្រកាសព័ត៌មាននេះ ក្នុងសន្និសីទកាសែតរួមគ្នាជាមួយលោក សនសៃ ស៊ីផាន់ដន នាយករដ្ឋមន្រ្តីរដ្ឋមន្រ្តីឡាវ ក្រោយបញ្ចប់ជំនួប កាលពីថ្ងៃទី១៣ ខែកុម្ភៈ ឆ្នាំ២០២៣។ ដំណើរទស្សនកិច្ចរបស់សម្តេច និងគណៈប្រតិភូកម្ពុជានៅឡាវ ប្រព្រឹត្តទៅពីថ្ងៃទី១៣ ដល់ថ្ងៃទី១៤កុម្ភៈ។ 
 

សម្តេចនាយករដ្ឋមន្រ្តី លើកឡើងថា ករណីបញ្ជូនអ្នកទោសទៅប្រទេសកំណើតរបស់ពួកគេនេះ កម្ពុជា ក៏បានធ្វើជាមួយថៃដែរ។ សម្តេច សង្កត់ធ្ងន់ថា ការបញ្ជូនអ្នកទោសឡាវ និងអ្នកទោសថៃ ដែលជាប់ឃុំនៅកម្ពុជា ទៅប្រទេសកំណើតរបស់ពួកគេ នឹងត្រូវធ្វើឡើងឲ្យបានមុនពិធីចូលឆ្នាំថ្មីនៃប្រទេសទាំង៣នេះ ដែលនឹងប្រព្រឹត្តទៅក្នុងអំឡុងខែមេសា ឆ្នាំ២០២៣ដូចគ្នា។  

មេដឹកនាំកម្ពុជា បញ្ជាក់ដូច្នេះថា៖«ខ្ញុំ បានប្រាប់សម្តេចក្រឡាហោម ស ខេង [ឧបនាយករដ្ឋមន្រ្តី-រដ្ឋមន្រ្តីក្រសួងមហាផ្ទៃ] ឲ្យធ្វើការជាមួយ [ឯកឧត្តម កើត រិទ្ធ] រដ្ឋមន្រ្តីក្រសួងយុត្តិធម៌ ដើម្បីធ្វើកិច្ចការនេះឲ្យបានឆាប់»។ 
 

ពាក់ព័ន្ធនឹងភាគីថៃវិញ សម្តេច ហ៊ុន សែន ធ្លាប់ពិភាក្សាជាមួយលោក ឆឺតគៀត អាត់ថាក័រ (Cherdkiat Atthakor) ឯកអគ្គរាជទូតថៃប្រចាំកម្ពុជា កាលពីអំឡុងខែមករា ឆ្នាំ២០២៣ អំពីការផ្ទេរអ្នកទោសនេះ។ សម្តេច បានឯកភាពជាមួយភាគីថៃ ហើយបានប្រាប់ឲ្យក្រសួងយុត្ដិធម៌ ពិនិត្យលើការបញ្ជូនអ្នកទោសថៃ ទៅប្រទេសរបស់ពួកគេវិញ ដោយមិនចាំបាច់ធ្វើបត្យាប័ននោះទេ ពោលគឺ ផ្លាស់ប្ដូរអ្នកទោសទៅវិញទៅមក ដោយយោងទៅលើការស្ម័គ្រចិត្តរបស់ពួកគេ។