មុនខួបមួយឆ្នាំនៃរុស្ស៊ីចូលឈ្លានពានអ៊ុយក្រែន សន្និសីទសន្តិសុខក្រុងម៉ូនិច (Munich Security Conference) ត្រូវបានរៀបចំឡើងនៅថ្ងៃទី១៧ ខែកុម្ភៈ។ ក្នុងសន្និសីទនេះ លោក វ៉ូឡូឌីមៀ ហ្សេលេនស្គី ន ប្រធានាធិបតីអ៊ុយក្រែន ត្រូវបានអនុញ្ញាតឱ្យថ្លែងសុន្ទរកថា តាមប្រព័ន្ធវីដេអូ ខណៈមេដឹកនាំផ្សេង បានចូលរួមដោយផ្ទាល់។ 

 

«យើងត្រូវតែប្រញាប់ឡើង។ យើងត្រូវការល្បឿន...ល្បឿននៃការដឹកជញ្ជូនអាវុធ...ល្បឿននៃការធ្វើសេចក្តីសម្រេច ដើម្បីកម្រិតការវាយប្រហាររបស់រុស្ស៊ី»។ ប្រធានាធិបតីអ៊ុយក្រែន បានសង្កត់ធ្ងន់បែបនេះ ដោយបន្ថែមថាគ្មានឡើយការផ្លាស់ប្តូរ ចំពោះជ័យជម្នះអ៊ុយក្រែន ។ 

 

ទន្ទឹមនឹងនេះ មេដឹកនាំអ៊ុយក្រែនក៏បានព្រមានផងដែរថា លោកវ្ល៉ាឌីមៀ ពូទីន ប្រធានាធិបតី រុស្ស៊ី នឹងមិនបញ្ឈប់ការឈ្លានពានត្រឹមអ៊ុយក្រែនឡើយ។ ត្រង់ចំណុចនេះ លោកហ្សេលេនស្គី ទំនងចង់មានន័យថា រុស្ស៊ីក្រោមការដឹកនាំរបស់លោកពូទីន អាចនឹងឈ្លានពានប្រទេស ផ្សេងទៀត នៅពេលខាងមុខ។ នេះបើតាមការចុះផ្សាយរបស់សារព័ត៌មាន Al Jazeera។ 

 

ក្នុងសន្និសីទដដែល មេដឹកនាំអាល្លឺម៉ង់ និងបារាំង បានស្នើឱ្យមានការផ្តល់ជំនួយរថក្រោះ និងយោធាបន្ថែមទៅអ៊ុយក្រែន ដើម្បីទប់ជាមួយរុស្ស៊ីផងដែរ។ 

 

សូមបញ្ជាក់ថា ការជំរុញឱ្យមានការពន្លឿនអាវុធ និងជំនួយយោធាបន្ថែមខាងលើនេះ ធ្វើឡើងស្របពេលរដ្ឋាភិបាលក្រុងកៀវ រំពឹងថា នឹងមានការវាយប្រហារទ្រង់ទ្រាយធំពីសំណាក់ក្រុងមូស្គូ នៅក្នុងខួបមួយឆ្នាំនៃការឈ្លានពាន៕