«ខ្ញុំបានអញ្ជើញប្រធានាធិបតីឡាវ ហើយគាត់នឹងមកចូលរួមកម្មវិធីបើកកីឡាស៊ីហ្គេមឆ្នាំ២០២៣»។ សម្តេច ហ៊ុន សែន បានស្នើទៅលោក ស៊ីសូលី ដូច្នេះអំឡុងទស្សនកិច្ចនៅប្រទេសឡាវកាលពីថ្ងៃទី១៤ ខែកុម្ភៈ។
 

៤ថ្ងៃបន្ទាប់ ពោលនៅថ្ងៃទី១៨ ខែកុម្ភៈ ក្នុងដំណើរទៅទីក្រុងហាណូយប្រទេសវៀតណាមដើម្បីចូលរួមកិច្ចប្រជុំគណបក្សទាំងពីរ សម្តេចហ៊ុន សែនក៏បានអញ្ជើញនាយករដ្ឋមន្ត្រីវៀតណាម លោក ផាម មិញជិញ ឱ្យចូលរួមពិធីបើកការប្រកួតផ្លូវការការប្រកួតស៊ីហ្គេមលើកទី៣២នេះផងដែរ។
 

នៅចំពោះមុខនិស្សិត នាពិធីប្រគល់វិញ្ញាបនបត្រសាកលវិទ្យាល័យធនធាន​មនុស្ស ប្រមុខរដ្ឋាភិបាលកម្ពុជាបានរៀបរាប់ពីការអញ្ជើញនាយករដ្ឋមន្ត្រីវៀតដូច្នេះថា៖«ព្រឹត្តិការណ៍នេះយើងរង់ចាំ៦៤ឆ្នាំហើយ ដូច្នេះលោកនាយករដ្ឋមន្ត្រីវៀតមកចូលរួមផង។ យ៉ាងណាលោកផាម មិញជិញ ត្រូវពិនិត្យមើលវេលាសិន ហើយយ៉ាងហោចណាស់ប្រធានាធិបតីឡាវនឹងចូលរួមទស្សនកិច្ចនៅកម្ពុជាផង និងពិធីបើកស៊ីហ្គេមផង»។ សម្តេចបន្ថែមថា នៅពេលឡាវធ្វើស៊ីហ្គេមសម្តេចក៏បានទៅចូលរួមពិធីបើកដែរ។
 

នាយករដ្ឋមន្ត្រីកម្ពុជា ក៏បានអរគុណដល់គណកម្មការរៀបចំកីឡាស៊ីហ្គេមទាំងអស់ដែលបានខិតខំរៀបចំព្រឹត្តិការណ៍នេះ ដោយចាត់ទុកការទទួលធ្វើម្ចាស់ផ្ទះកីឡាតំបន់អាស៊ានលើកដំបូងជាប្រវត្តិសាស្ត្រ មិនមែនជារឿងសាមញ្ញឡើយ។
 

«សម្តេចពិជ័យសេនា ទៀ បាញ់ លោកថោន ខុន និងលោក វ៉ាត់ចំរើន បានធ្វើការដ៏ល្អអំពីការរៀបចំកីឡានេះ ហើយគម្រោងថវិការដើម្បីដំណើរការព្រឹត្តិការណ៍ទាំងមូលមានចំនួន១២០លានដុល្លារ ដោយមិនគិតលើការសាងសង់ហេដ្ឋារចនាសម្ព័ន និងទីលានកីឡាមួយចំនួននោះទេ» នេះជាការបញ្ជាក់របស់សម្តច ហ៊ុន សែន។
 

ស្របពេលការប្រកួតនៅសល់៧៤ថ្ងៃទៀត នឹងចូលមកដល់ សម្តេចហ៊ុន សែន សង្ឃឹមថាម្ចាស់ផ្ទះកម្ពុជានឹងរៀបចំបានល្អ ជាពិសេការគ្រប់គ្រងព្រឹត្តិការណ៍ទាំងមូល ពោលគឺសំខាន់ជាងការឈ្នះមេដាយទៅទៀត។ មួយវិញទៀត ប្រមុខរដ្ឋាភិបាល ស្នើប្រជាពលរដ្ឋមិនថានៅភ្នំពេញ និងក្រុងនានាដែលត្រូវទទួលរៀបចំការប្រកួតប៉ុណ្ណោះទេ ត្រូវរក្សា និងបង្កើនគុណភាពអានាម័យ ដ្បិតមានអ្នកគាំទ្រ អ្នកទេសចរពីបរទេសច្រើនណាស់នឹងមកដល់កម្ពុជា។
 

ការប្រកួតផ្លូវការ និងពិធីបើកព្រឹតិ្តការណ៍កីឡាស៊ីហ្គេមលើកទី៣២ ឆ្នាំ២០២៣ ដែលកម្ពុជាទទួលរៀបចំលើកដំបូង នឹងធ្វើឡើងនៅថ្ងៃទី៥ ខែឧសភា ហើយបញ្ចប់នៅថ្ងៃទី១៧ ខែឧសភា ឆ្នាំ២០២៣៕