អន្តរជាតិ
ប្រធានាធិបតីរុស្ស៊ី ប្រកាសផ្អាកអនុវត្តសន្ធិសញ្ញារឹតត្បិតក្បាលគ្រាប់នុយក្លេអ៊ែរជាមួយអាម៉េរិក
លោកវ្ល៉ាឌីមៀ ពូទីន ប្រធានាធិបតីរុស្ស៊ី។ រូបភាព Reuters
×![]()
ដោយ: ធៀន ភារិន្ទ
ប្រធានាធិបតីរុស្ស៊ី លោក វ្ល៉ាឌីមៀ ពូទីន នៅថ្ងៃទី២១ ខែកុម្ភៈ បានប្រកាសព្យួរសន្ធិសញ្ញារឹតត្បិតក្បាលគ្រាប់នុយក្លេអ៊ែរ New Start ដែលសល់ តែមួយគត់ជាមួយអាម៉េរិក។
ប្រធានាធិបតីរុស្ស៊ី លោក វ្ល៉ាឌីមៀ ពូទីន នៅថ្ងៃទី២១ ខែកុម្ភៈ បានថ្លែងសុន្ទរកថាមួយទៅកាន់ប្រជាជាតិខ្លួន ស្របពេលសង្គ្រាមនៅអ៊ុយក្រែនឈានចូលខួប ១ឆ្នាំ។ ក្នុងសុន្ទរកថាដែលមានអ្នកសារព័ត៌មានជាតិ និងអន្តរជាតិតាមដាន លោកពូទីន បានប្រកាសផ្អាកការអនុវត្តសន្ធិសញ្ញា New Start ដែលសល់ តែមួយគត់ជាមួយអាម៉េរិក។ សន្ធិសញ្ញានេះ មានគោលបំណង រឹតត្បិតក្បាលគ្រាប់នុយក្លេអ៊ែររវាងប្រទេសទាំងពីរសម្រាប់លើអាវុធផ្សេងៗ។
«ខ្ញុំត្រូវបានជំរុញឱ្យប្រកាសនៅថ្ងៃនេះថា រុស្ស៊ីកំពុងព្យួរការចូលរួមរបស់ខ្លួនក្នុងសន្ធិសញ្ញាអាវុធវាយប្រហារយុទ្ធសាស្ត្រ»។ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានសង្កត់ធ្ងន់បែបនេះ ដោយបន្ថែមថា រុស្ស៊ីចាំបាច់ត្រូវតែត្រៀមខ្លួនសម្រាប់ការសាកល្បងអាវុធនុយក្លេអ៊ែរ ប្រសិនបើអាម៉េរិកធ្វើបែបនេះដែរ។
ទន្ទឹមនេះ លោកពូទីន ក៏បានទម្លាក់កំហុសលើប្រទេសលោកខាងលិច និងអ៊ុយក្រែនផង ដែលធ្វើឱ្យមានសង្គ្រាមផ្ទុះឡើង។ មិនខុសពីលើកមុនឡើយ លោកពូទីន ថា ការពង្រីកខ្លួនរបស់អង្គការណាតូ និងប្រព័ន្ធប្រឆាំងរ៉ុក្កែតរបស់អឺរ៉ុប ជាអ្នកបង្ករឿងចំពោះរុស្ស៊ី។
សន្ធិសញ្ញា New Start ត្រូវបានចុះហត្ថដោយប្រធានាធិបតីអាម៉េរិក លោក បារ៉ាក់ អូបាម៉ា និងសមភាគីរុស្ស៊ី Dmitry Medvedev នៅក្នុងឆ្នាំ២០១០។ សន្ធិសញ្ញានេះ បានចូលជាធរមាននៅក្នុងឆ្នាំ២០១១។ នៅក្នុងឆ្នាំ២០២១ អាម៉េរិកបានបន្តសន្ធិសញ្ញានេះរយៈពេល ៥ឆ្នាំបន្ថែមទៀត ក្រោយលោក ចូ បៃឌិន ប្រធានាធិបតីអាម៉េរិក ឡើងកាន់តំណែង។
ក្រោយប្រកាសព្យួរបែបនេះ ប្រមុខអង្គការណាតូ លោក Jens Stoltenberg បានជំរុញឱ្យលោកពូទីនពិចារណាឡើងវិញ។ បើតាមលោក Stoltenberg ការផ្អាកការអនុវត្តរបស់រុស្ស៊ី មានតែបន្តឱ្យសង្គ្រាមកាន់តែរីកសាយប៉ុណ្ណោះ។
ចំណែកលោក Mikhail Ulyanov មន្ត្រីរុស្ស៊ីមួយរូប បានសរសេរលើបណ្តាញសង្គម Twitter ថាការផ្អាកការអនុវត្តសន្ធិសញ្ញា New Start មិនមែនជាការដើរចេញឡើយ ហើយរុស្ស៊ីអាចមានលទ្ធភាពត្រលប់មកអនុវត្តវិញ៕
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
