ក្រោយការបាញ់ភ្លើងឡាស៊ែរដាក់នាវាល្បាតខ្លួនពីសំណាក់ចិន ហ្វីលីពីន បានជជែកជាមួយប្រទេសជាបន្តបន្ទាប់ជុំវិញការល្បាតរួមគ្នានៅក្នុងសមុទ្រចិនខាងត្បូង។ បន្ថែមពីលើអាម៉េរិក ហ្វីលីពីន បានពិភាក្សាជាមួយអូស្រ្តាលីថែមទៀត ជុំវិញបញ្ហានេះ។ 

 

«នៅថ្ងៃនេះ យើងពិតជាបានជជែកអំពីលទ្ធភាពល្បាតរួមគ្នា ហើយយើងនឹងបន្តធ្វើការងារនោះ និងសង្ឃឹមថាទទួលបានលទ្ធផលល្អក្នុងពេលឆាប់ៗនេះ»។ លោកRichard Marles រដ្ឋមន្រ្តីការពារជាតិអូស្រ្តាលី បានបញ្ជាក់បែបនេះ នៅក្នុងសន្និសីទសារព័ត៌មានរួមមួយជាមួយសមភាគីហ្វីលីពីន Carlito Galvez នៅក្នុងក្រុងម៉ានីល ដោយបន្តថា ដោយប្រទេសទាំងពីរប្តេជ្ញាចំពោះសណ្តាប់ធ្នាប់អន្តរជាតិ ប្រទេសទាំងពីរ បានគិតពិចារណាអំពីវិធីសាស្រ្ត ដែលអាចសហការជាមួយគ្នាបាននៅក្នុងវិស័យនេះ។ 

 

មុនជំនួបនេះ រដ្ឋមន្រ្តីការពារជាតិហ្វីលីពីន ក៏បានជជែកតាមទូរសព្ទជាមួយសមភាគីអាម៉េរិកផង ជុំវិញសេចក្តីសម្រេចលើការចាប់ផ្តើមឡើងវិញនៃប្រទេសទាំងពីរសម្រាប់សកម្មភាពរួមគ្នានៅក្នុងសមុទ្រចិនខាងត្បូង។ រដ្ឋមន្រ្តីប្រទេសទាំងពីរ ក៏បានបង្ហាញក្តីបារម្ភចំពោះស្ថានការណ៍វិវដ្ដនៅក្នុងសមុទ្រចិនខាងត្បូងផង។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។ 

 

នៅដើមខែកុម្ភៈកន្លងទៅ នាវាល្បាតចិន បានបាញ់ភ្លើងឡាស៊ែរ ដាក់នាវាល្បាតហ្វីលីពីនក្នុងគោលបំណងរារាំងមិនឱ្យឆ្ពោះទៅតំបន់ Second Thomas Shoal ដើម្បីផ្គត់ផ្គង់កម្លាំងទ័ពហ្វីលីពីននៅទីនោះ។ ប៉ុន្តែ អ្នកនាំពាក្យក្រសួងការបរទេសចិន បាននិយាយការពារសកម្មភាពយោធាខ្លួនថា នាវាល្បាតហ្វីលីពីន បានឆ្លងមកក្នុងដែនទឹកចិនដោយគ្មានការអនុញ្ញាត៕