លោកស្រី ជា គឹមថា ក្លាយជាឯកអគ្គរាជទូតកម្ពុជាថ្មីប្រចាំប្រទេសវៀតណាម បន្តពីលោក ចាយ ណាវុធ ដែលបានផុតអណត្តិ ហើយទទួលបានការតែងតាំងជាអនុរដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ។

 

«មន្ត្រីការទូត និងបុគ្គលិកនៃស្ថានឯកអគ្គរាជទូត សូមសម្តែងនូវមនោសញ្ចេតនាសប្បាយរីករាយ និងអបអរសាទរយ៉ាងកក់ក្តៅជូនចំពោះលោកជំទាវឯកអគ្គរាជទូតវិសាមញ្ញ និងពេញសមត្ថភាព នៃព្រះរាជាណាចក្រកម្ពុជា ប្រចាំសាធារណរដ្ឋសង្គមនិយមវៀតណាម និងសូមជូនពរលោកជំទាវទទួលបានជោគជ័យក្នុងបេសកកម្មការទូតដ៏ឧត្តុង្គឧត្តម»។ នេះជាសារជូនពររបស់មន្ត្រីស្ថានទូតកម្ពុជាប្រចាំវៀតណាមតាមរយៈទំព័រហ្វេសប៊ុកផ្លូវការរបស់ស្ថានទូត។

 

យោងតាមប្រវត្តិរូបដែលបង្ហោះនៅលើគេហទំព័រក្រសួងការបរទេស លោកស្រី ជា គឹមថា កើតនៅថ្ងៃទី១០ ខែមេសា ឆ្នាំ១៩៦១ នៅខេត្តកំពង់ចាម។ នៅឆ្នាំ១៩៨៣ លោកស្រី ទទួលបានសញ្ញាបត្រអនុបណ្ឌិតផ្នែកសង្គមវិទ្យា នៅសាកលវិទ្យាល័យ Karl Marx ប្រទេសអាល្លឺម៉ង់។

 

 

សម្រាប់ការងារការទូត លោកស្រីធ្លាប់ធ្វើជាអគ្គទីប្រឹក្សាកុលស៊ុលនៃស្ថានទូតកម្ពុជាប្រចាំក្រុងតូក្យូ ហើយក្រោយមកជាឯកអគ្គរាជទូតកម្ពុជាប្រចាំប្រទេសជប៉ុនពីឆ្នាំ២០១៥-២០១៨។ នៅក្រសួងការបរទេស លោកស្រីធ្លាប់កាន់តំណែងជាប្រធាននាយកដ្ឋានកិច្ចសហប្រតិបត្តិការមេគង្គ, ប្រធាននាយកដ្ឋានអាមេរិក និងប្រធាននាយកដ្ឋានកិច្ចសហប្រតិបត្តិការអន្តរជាតិ។

 

ពីឆ្នាំ២០១៨ ដល់២០២០ លោកស្រីជាអគ្គនាយិកាទទួលបន្ទុកអាស៊ីប៉ាស៊ីហ្វិក មុនក្លាយជាអនុរដ្ឋលេខាធិការក្រសួងការបរទេស៕