ព្រឹត្តិការណ៍នេះរៀបចំឡើងក្នុងគោលបំណង ផ្សព្វផ្សាយអំពីត្រីចំណិតយូនិកា លើកកម្ពស់ផលិតផលត្រីក្នុងស្រុក និងពង្រីកទីផ្សារ ផលិតផលត្រីកែច្នៃ នៅកម្ពុជា តាមរយៈការគាំទ្រវារីវប្បករខ្មែរ និងសហគ្រាសធុនតូច និងមធ្យម អំពីសុវត្ថិភាព និងគុណភាពចំណីអាហារ ឱ្យកាន់តែស៊ីជម្រៅ។

 

ព្រឹត្តិការណ៍ផ្សព្វផ្សាយពិព័រណ៍ត្រីក្នុងស្រុក នឹងមានការអញ្ជើញចូលរួមពីលោក ជីម ហឺស្សីយ នាយកគម្រោងខាស់ លោកបណ្ឌិត ឈួន ចំណាន ប្រធាននាយកដ្ឋានបច្ចេកវិទ្យាកែច្នៃ និងគុណភាពនៃរដ្ឋបាលជលផល ព្រមទាំងអ្នកជំនាញ ផ្នែកសុវត្ថិភាព ចំណីអាហារ សហគ្រាសធុនតូច និងមធ្យម ចូលរួមជជែកពិភាក្សា ចែករំលែកបទពិសោធន៍ បញ្ហាប្រឈមសុវត្ថិភាពចំណីអាហារ ដែលជាកត្តាចម្បង ដែលអតិថិជន ឬអ្នកប្រើប្រាស់គួរយកចិត្តទុកដាក់លើគុណភាព និងសុវត្ថិភាពផលិតផលត្រីកែច្នៃនៅប្រទេសកម្ពុជា។

 

ព្រឹត្តិការណ៍នេះ ក៏អនុញ្ញាតឱ្យសារធារណជនចូលរួមដោយសេរី ដើម្បីយល់ដឹងកាន់តែច្បាស់អំពីផលិតផលត្រីក្នុងស្រុក និងភ្លក់រសជាតិ ផលិតផលត្រីយូនិកាផងដែរ។  

 

តាមរយៈការគាំទ្រ និងពង្រឹងគុណភាព ទីផ្សារផលិតផលត្រីក្នុងស្រុក និងលើកកម្ពស់វារីវប្បករខ្មែរ យូនិកា ក៏សង្ឃឹមយ៉ាងមុតមាំថា សកម្មភាពទាំងនេះ នឹងចូលរួមចំណែកគាំទ្រផលិតផលត្រីចំណិតពីយូនិកា លើកកម្ពស់គុណភាព ផលិតផលត្រីកែច្នៃនៅកម្ពុជា ឱ្យកាន់តែល្អ ប្រសើរជាងមុន ជាពិសេសលើកកម្ពស់ការយល់ដឹងពីសុវត្ថិភាពចំណីអាហារនិងសុខុមាលអ្នកបរិភោគ។ 

បើតាមលោក អីម ថាណូ នាយកបច្ចេកទេសគម្រោងខាស​ បានមានប្រសាសន៍ថា៖ “គម្រោងខាស់ចូលរួមគិតគូរ ពីសុវត្ថិភាពចំណីអាហារ និងសុខភាពរបស់ អ្នកបរិភោគជាចម្បង ក្នុងទិសដៅស្របគ្នាជាមួយនឹងយុទ្ធសាស្រ្តថ្នាក់ជាតិ។” 

 

ត្រីចំណិតយូនិកាផលិតពីត្រីរ៉ស់ក្នុងស្រុក ១០០% មានប្រូតេអ៊ីនខ្ពស់ មានបរិមាណស្ករ និងអំបិលតិច គ្មានបន្ថែមសារធាតុ រក្សាទុកសុវត្ថិភាព គុណភាពខ្ពស់ រសជាតិឆ្ងាញ់ ពិសេសមានការសម្រិតសម្រាំងក្នុងការផលិត តាំងពីការភ្ញាស់កូនត្រី ការចិញ្ចឹមថែទាំត្រី ព្រមទាំងកែច្នៃយ៉ាងយកចិត្តទុកដាក់បំផុត។ បន្ថែមពីនេះផលិតផលត្រីរបស់ យូនិកា ត្រូវបានសម្ងួតក្នុងបន្ទប់សូឡា និងវេចខ្ចប់ ទុកដាក់ប្រកបដោយអនាម័យ និង អនុលោមតាមគោលការណ៍សុវត្ថិភាពចំណីអាហារ។

 

ព្រឹត្តិការណ៍ផ្សព្វផ្សាយពិព័រណ៍ត្រីក្នុងស្រុក  គឺជាផ្នែកមួយនៃព្រឹត្តិការណ៍ផ្សព្វផ្សាយរបស់គម្រោងខាស់ ដែលធ្វើឡើងក្នុង គោលបំណង លើកកម្ពស់ ផលិតផលត្រីកែច្នៃ និងគាំទ្រខ្សែសង្វាក់អាជីវកម្មរបស់សហគ្រាសធុនតូច និងមធ្យម ទាំង៣ រួមមាន៖ ផ្សារដាវ៉ាន់ (Davane) យូនិកា (Unica) និងហូមថេសហ្វូដ (Home-Taste Food)។ ក្នុងនោះ សកម្មភាពសំខាន់ៗមួយចំនួន នឹងត្រូវធ្វើឡើងដូចជា ការផលិតវីដេអូផ្សព្វផ្សាយ ការរៀបចំព្រឹត្តិការណ៍ផ្សព្វផ្សាយ ការរៀបចំព្រឹត្តិការណ៍ផែនទីបង្ហាញផ្លូវ ការបង្កើតមាតិកាឌីជីថល និងបង្កើត សម្ភារៈផ្សព្វផ្សាយជាដើម៕

លោកស្រី ពេជ្រ គីមធា គម្រោងអភិវឌ្ឍន៍វារីវប្បកម្មសម្រាប់និរន្តរភាពពាណិជ្ជកម្មនៅកម្ពុជា 

អ៊ីម៉ែល : [email protected]

លេខទូរស័ព្ទ: (+855) 10 531 160

 

UNICA គឺជាសហគ្រាសកសិ-ម្ហូបអាហារ និងនេសាទដែលបានបង្កើតឡើងក្នុងឆ្នាំ២០១៤ ដែលដំបូងឡើយយើងធ្វើការជាមួយសហករណ៍កសិកម្ម និងសហគមន៍នេសាទនៅតាមដងទន្លេមេគង្គ និងតំបន់ឆ្នេរ។ ក្រុមហ៊ុនរបស់យើង ត្រូវបានពង្រីក ជាបន្តបន្ទាប់ ដើម្បីគាំទ្រ ផលិតផលកែច្នៃក្នុងស្រុក អ្នកផលិត និងកសិដ្ឋានវារីវប្បកម្មក្នុងខេត្តផងដែរ។ UNICA ក៏មានផលិតផល  សំខាន់ៗ ដែលរួមមាន ត្រីចំណិត ត្រីងៀត ត្រីហឹរ ត្រីឆ្អើរ បង្ការក្រៀម មឹកក្រៀម ត្រីស្រស់ និងផលិតផលមាន់ស្រែផងដែរ។ បន្ថែមពីនេះ UNICA ក៏ផ្តោតសំខាន់ លើផលិតផលរបស់ខ្លួន ដោយធានាគុណភាពខ្ពស់ ទៅតាមការអនុលោមនៃសុវត្ថិភាព ចំណីអាហារ ក្នុងនោះយើងក៏មាន ការផ្គត់ផ្គង់ផលិតផលដល់ដៃគូរហាងលក់រាយ ហាងបៃតង និងផ្សារទំនើបនានា ក្នុងរាជធានីភ្នំពេញផងដែរ។