កាលពីថ្ងៃទី១៦ ខែកុម្ភៈ រដ្ឋបាលព្រៃឈើ បានដកហូតសត្វក្ងោក៦ក្បាលពីផ្ទះរបស់ក្រុមគ្រួសារមួយនៅស្រុកបរិបូណ៌ ខេត្តកំពង់ឆ្នាំង។ តាមលិខិតចុះថ្ងៃទី២៣ ខែកុម្ភៈ លោក កែវ អូម៉ាលីស្ស ប្រតិភូរាជរដ្ឋាភិបាល ទទួលបន្ទុរដ្ឋបាលព្រៃឈើ តម្រូវឱ្យលោក យឹម សំអឿន ចូលបំភ្លឺនៅថ្ងៃទី៣ ខែមិនា ទាក់ទងនឹង «ការយកធ្វើជាកម្មសិទ្ធិចិញ្ចឹម បង្កាត់ពូជសត្វព្រៃ ដោយគ្មានការអនុញ្ញាត»។

 

កន្លងមក ក្រុមការងារបង្គ្រាបបទល្មើសសត្វព្រៃកម្ពុជា បានបញ្ជាក់ប្រាប់ ThmeyThmey25ថា ករណីចុះបង្ក្រាបសត្វក្ងោកពូជខ្មែរចំនួន៦ក្បាល និងពូជក្ងោកឥណ្ឌាចំនួន១៤ក្បាលនោះ ក្រុមការងារអនុវត្ដតាមច្បាប់ព្រៃឈើប៉ុណ្ណោះ។ 

 

ចំពោះក្ងោកបៃតងរបស់ខ្មែរចំនួន៦ក្បាលនោះ ស្ថិតក្រោមវិសាលភាពនៃច្បាប់ព្រៃឈើ ដូច្នេះក្រុមការងារ កំពុងដំណើរការបន្ត ដើម្បីដោះស្រាយជាមួយម្ចាស់សាមី។ ក្រៅពីនេះ ចំពោះក្ងោកឥណ្ឌា១៤ក្បាលវិញ ក្រុមការងារបានសុំឱ្យម្ចាស់ប្រគល់ ឱ្យបណ្ដោះអាសន្ន និងយកទៅរក្សានៅភ្នំតាម៉ៅ ដើម្បីចាត់វិធានការបន្ដ។