នាពិធីបើកវគ្គហ្វឹកហ្វឺនទម្រង់ល្បុក្កតោអបអរសាទរកម្មវិធីបើក-បិទ ក្នុងព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ នៅបរិវេណគណៈបញ្ជាការដ្ឋានអង្គរក្ស ក្នុងខេត្តកណ្តាល ថ្ងៃទី២៧ ខែកុម្ភៈ ឆ្នាំ២០២៣ លោក អ៊ួ តារា អគ្គលេខាធិការសហព័ន្ធកីឡាគុនល្បុក្កតោកម្ពុជា ជឿជាក់ថាបន្ទាប់ពីកម្លាំងទាហានទទួលបានការហ្វឹកហ្វឺនហើយនឹងសម្តែងទស្សនីយភាពបានល្អក្នុងកម្មវិធីបើកស៊ីហ្គេមលើកទី៣២។

 

«យើងសង្ឃឹមថា តាមរយៈការហាត់សមនេះនឹងបង្ហាញចេញនូវទស្សនីយភាពដ៏អស្ចារ្យ ក្នុងពិធីបើកស៊ីហ្គេម»។ លោក អ៊ួ តារា បន្ថែមថាថ្វីដ្បិតចំនួន ១២០០នាក់នេះតិចជាងការសម្តែងក្នុងព្រឹត្តិការណ៍កីឡាជាតិលើកទី៣ ក៏ពិតមែនតែមានគុណភាព និងអស្ចារ្យ ដែលសហព័ន្ធព្យាយាមធ្វើឱ្យបានល្អតាមគោលដៅដែលចង់បាន។

 

ចំណែកឯការសម្តែងក្នុងកម្មវិធីបិទកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ វិញក៏នឹងមានទស្សនីយភាពដ៏អាស្ចារ្យផងដែរ។ មន្រ្តីសហព័ន្ធដដែលបានសង្កត់ធ្ងន់ថា៖«ក្នុងកម្មវិធីបិទស៊ីហ្គេមនឹងមានកម្លាំង ៦០០នាក់សម្តែងទស្សនីយភាពមួយដ៏អស្ចារ្យ ដែលបង្ហាញពីមហាព្រលឹងគុនល្បុក្កតោ»។

ម្ចាស់ផ្ទះកម្ពុជា នឹងប្រារព្ធពិធីបើកព្រឹត្តិការណ៍កីឡាស៊ីហ្គេមលើកទី៣២ ឆ្នាំ២០២៣ នៅថ្ងៃទី៥ ខែឧសភា និងជាថ្ងៃចាប់ផ្តើមការប្រកួតផ្លូវការផងដែរ៕