យោងទៅលើការផ្សាយរបស់កាសែត Channel News Asia ការប្រកួតជើងទី២ រវាង Persebaya Surabaya និង Arema FC នឹងត្រូវពន្យារពេលបន្ថែមទៀត ដោយសាររឿងដ៏តក់ស្លុតនៃការស្លាប់របស់អ្នកគាំទ្រដ៏ច្រើន នៅតែដិតដាមជាប់ក្នុងចិត្តអ្នកគាំទ្រផ្សេងទៀតរបស់ក្រុមទាំង២នៅឡើយ។

 

លោក Dirmanto អ្នកនាំពាក្យរបស់ប៉ូលីស East Java បាននិយាយដូច្នេះថា៖«វាត្រូវបានចាត់ទុកថាមានហានិភ័យខ្ពស់ដោយសារតែក្លិបនានា មានប្រវត្តិនៃការប្រកួតប្រជែង បែបនេះ។»។ 
 

ម្យ៉ាងវិញទៀត លោក Yahya Alkatiri អ្នកចាត់ការទូទៅក្រុម Persebaya Surabaya ក៏អះអាងដែលថាការប្រកួតនេះ មិនអាចសុំការអនុញ្ញាតពីប៉ូលីសបានទេ ក្នុងការលេងនៅក្នុងកីឡដ្ឋាន Surabaya ដោយក្រោមហេតុផលកីឡដ្ឋានកំពុងសាងសង់បន្ថែម ដើម្បីត្រៀមរៀបចំការប្រកួត Under-20 World Cup នាអំឡុងខែឧសភា។ អ្នកចាត់ការរូបនេះ បានប្រាប់ទីភ្នាក់ងារព័ត៌មាន Reuters ដូច្នេះថា៖«នេះ គឺជាការប្រកួត ដែលពោពេញទៅដោយហានិភ័យខ្ពស់។ ដូច្នេះ ការប៉ះទង្គិចគ្នា អាចកើតឡើងនៅខាងក្រៅកីឡដ្ឋាន។»។
 

ក្រុមអ្នកស៊ើបអង្កេតបានសន្និដ្ឋានថា បញ្ហាចម្បងដែលបណ្ដាលឲ្យអ្នកគាំទ្រ ១៣៥នាក់ស្លាប់ក្នុងឧប្បត្តិវហេតុ រត់ចូលទីលាននោះ ដោយសារការប្រើប្រាស់ឧស្ម័នបង្ហូទឹកភ្នែក។ មធ្យោបាយក្នុងការគ្រប់គ្រងស្ថានការ នៃការប្រកួតបែបនេះ ត្រូវបាន FIFA ហាមប្រាមមិនឲ្យអនុវត្តទៀតនោះទេ។
 

គួរបញ្ជាក់ថា រឿងដ៏គួរឲ្យរន្ធត់បំផុតក្នុងវិស័យបាល់ទាត់នេះ កើតឡើង បន្ទាប់ពីក្រុមម្ចាស់ផ្ទះ Arema ចាញ់ក្រុមភ្ញៀវ Persebaya លទ្ធផល ៣-២ នៅកីឡដ្ឋាន Kanjuruhan កាលពីថ្ងៃទី១ ខែតុលា ឆ្នាំ២០២២។ លទ្ធផលនេះ ធ្វើឲ្យអ្នកគាំទ្រក្រុមម្ចាស់ផ្ទះ ប្រមាណជិត ៣០០០នាក់រត់ចូលទៅក្នុងទីលានទាំងខឹងសម្បារ។ ប៉ូលីសក្នុងហេតុការណ៍ បាននិយាយថាអ្នកគាំទ្របានបង្ករបួសស្នាម ដល់កីឡាករ និងមន្ដ្រីបច្ចេកទេសនៅក្នុងទីលាន។ ហេតុការណ៍ដដែរនេះ បានធ្វើឲ្យមនុស្ស ១៣៥នាក់ស្លាប់ និង៥៨៣នាក់ រងរបួស៕