ក្នុងរាជព្រះបាទរាជេន្ទ្រវម៌្មទី២ ព្រះអង្គ បានកសាងប្រាសាទមួយចំនួន បន្ទាប់ពីព្រះអង្គបានយាងត្រឡប់ពីរាជធានីកោះកេរ មករាជធានី យសោធរៈបុរៈ វិញនៅឆ្នាំ៩៤៤។ ស្នាព្រះហស្ថរបស់ព្រះបាទរាជេន្ទ្រវម៌្មទី២  មានដូចជា ប្រាសាទមេបុណ្យខាងកើត, ប្រាសាទប្រែរូប និងប្រាសាទបាតជុំ។ 

 

តាមរយៈស្ថាបត្យកម្ម ព្រះបាទរាជេន្ទ្រវម៌្មទី២ សង់ប្រាសាទអំពីឥដ្ឋ ដែលមានទម្រង់ជាប្រាសាទភ្នំ។ ប៉ុន្តែ ថ្មបាយក្រៀម និងថ្មភក់ ក៏ត្រូវបានប្រើប្រាស់ដើម្បីធ្វើជា កំពែង ខឿន សសរពេជ្រ ស៊ុមទ្វារ និងផ្ដែរ។ ប្រាសាទក្នុងរាជរបស់ព្រះអង្គរ មានសម្រស់ស្រស់ត្រកាលណាស់។ ប្រាសាទមេបុណ្យខាងកើត និងប្រាសាទប្រែរូប ជាសំណង់ឥដ្ឋដ៏វិសេសវិសុទ្ធបំផុតនាសម័យអង្គរ។ 

 

ប្រាសាទមេបុណ្យខាងកើត ក៏ជាសំណង់ដែលសង់អំពីឥដ្ឋលាយថ្មភក់ និងថ្មបាយក្រៀម។ ក្រៅពីប្រាង្គសំខាន់ៗទាំង៥ ក៏មានអគាររណបដែលមានទម្រង់ទ្រវែងៗសង់ព័ទ្ធស្ទើរជុំវិញ រួមទាំងប្រាង្គរណប ដែលសង់អំពីថ្មបាយក្រៀម និងអំពីឥដ្ឋជាច្រើនផ្សេងទៀត៕